ក្រុមហ៊ុន Motorola បានបើកទំព័រថ្មីនៃសែស្រឡាយស្មាតហ្វូនរបស់ខ្លួនជាមួយស្មាតហ្វូនប្រណីតធន់កណ្ដាល Motorola Edge 50 Pro ដែលមានបំពាក់ដោយឈីប Snapdragon 7 Gen 3, ប្រើអេក្រង់ AMOLED 1220p និង Refresh Rate 144Hz រួមទាំងប្រព័ន្ធកាមេរ៉ាបីគ្រាប់ផងដែរ។
Motorola Edge 50 Pro មានអេក្រង់កោងទំហំ ៦,៧អ៊ីញ អាចជះពន្លឺបានដល់ 2,000 nits ហើយលើអេក្រង់មានកាមេរ៉ាខាងមុខទំហំ 50MP ជាមួយមុខងារ Autofocus និងថែមទាំងមានទ្រនាប់ស្កេនខ្ចៅដៃបង្កប់លើអេក្រង់ថែមទៀតផង។
នៅផ្នែកខាងក្រោយមានកាមេរ៉ាគោលទំហំ 50MP អមជាមួយកាមេរ៉ា Telephoto ទំហំ 10MP អាច Zoom Optical បាន៣ដង និងកាមេរ៉ា Ultrawide ទំហំ 13MP ដែលអាចដើរតួជាកាមេរ៉ា Macro បាន។ Edge 50 Pro ជាស្មាតហ្វូនដំបូងរបស់ Motorola ដែលមាននូវបច្ចេកវិទ្យា AI Photo Enhancement Engine។
Edge 50 Pro នេះមានបំពាក់ថ្មទំហំ 4500mAh ដែលមានកម្លាំងសាក 125W និងអាចសាកភ្លើងដោយឥតប្រើខ្សែបានកម្លាំង 50W ជាមួយអាវក្រោះការពារទឹក IP68។
តម្លៃរបស់ Edge 50 Pro នៅឯប្រទេសឥណ្ឌាគឺប្រមាណ ៣៨៣ដុល្លារ សម្រាប់ RAM 8GB / ROM 256GB ខណៈប្រភេទ RAM 12GB / ROM 256GB មានតម្លៃប្រមាណ ៤៣១ដុល្លារ៕