ប្រាក់ចំណូលរបស់បណ្ដាញទំនាក់ទំនង TikTok ក្នុងសហរដ្ឋអាមេរិក រំពឹងថានឹងឈានដល់កំណត់ត្រាថ្មី ជាមួយតួលេខ ១៦ពាន់លានដុល្លារ សម្រាប់ពេញមួយឆ្នាំ២០២៣ ទោះបីជាបណ្ដាញសង្គមនេះប្រឈមមុខនឹងការហាមឃាត់ក៏ដោយក្ដី។
ប្រភពចំនួនបីដែលបានដឹងអំពីក្រុមហ៊ុន ByteDance និង TikTok បានប្រាប់សារព័ត៌មាន FT ថា TikTok សម្រេចបានប្រាក់ចំណូលខ្ពស់បំផុតកាលពីឆ្នាំមុននៅលើទីផ្សារសហរដ្ឋអាមេរិក ជាការកើនឡើង ៤០%។ ក្រុមហ៊ុន ByteDance ដែលជាមេរបស់ TikTok ក៏រំពឹងថានឹងអាចវ៉ាក្រុមហ៊ុន Meta ក្លាយជាក្រុមហ៊ុនបណ្ដាញសង្គមធំជាងគេផងដែរ។
តួលេខនៃចំណូលរបស់ TikTok នៅសហរដ្ឋអាមេរិក ត្រូវបានបង្ហាញពេលដែលបណ្ដាញសង្គមនេះប្រឈមមុខនឹងភាពមិនច្បាស់លាស់នៅប្រទេសចិន។ កាលពីថ្ងៃទី១៣ ខែមីនា អ្នកតំណាងសភាសហរដ្ឋអាមេរិក បានអនុម័តសេចក្ដីព្រាងច្បាប់ដែលបង្ខំឲ្យ ក្រុមហ៊ុន ByteDance លក់ភាគហ៊ុន TikTok ឲ្យសហរដ្ឋអាមេរិក ក្នុងពេល៦ខែក្រោយបន្ទាប់។
តាមការចុះផ្សាយរបស់ Reuters មានបុគ្គល និងក្រុមហ៊ុនជាច្រើនចាប់ផ្ដើមពិចារណាទិញយក TikTok ខណៈតម្លៃ TikTok នៅអាមេរិកនាពេលបច្ចុប្បន្ន ប៉ាន់ស្មានថាមានប្រមាណ ១៥០ពាន់លានដុល្លារ៕