ក្រុមហ៊ុន Apple បានយល់ព្រមបង់ប្រាក់ ៤៩០លានដុល្លារ ដើម្បីដោះស្រាយករណីបណ្ដឹងដែលចោទប្រកាន់ថាលោក Tim Cook នាយកប្រតិបត្តិ Apple បានលាក់បាំងការពិតពីម្ចាស់ភាគហ៊ុនពីការថយចុះតម្រូវការនៃ iPhone ក្នុងប្រទេសចិន។
កាលពីថ្ងៃទី១ ខែវិច្ឆិកា ឆ្នាំ២០១៨ ក្នុងពេលប្រកាសអំពីស្ថានភាពហិរញ្ញវត្ថុ លោក Tim Cook បាននិយាយថា Apple បានប្រឈមមុខនឹងសម្ពាធក្នុងទីផ្សារមួយចំនួនដែលរូបិយបណ្ណ័ក្នុងស្រុកចុះខ្សោយ ដូចជាប្រទេសទួរគី ឥណ្ឌា ប្រេស៊ីឡ និងរុស្ស៊ី ប៉ុន្តែលោកមិនបានបញ្ចូលប្រទេសចិនក្នុងនោះឡើយ។
ពេលនោះ លោក Tim Cook លើកឡើងថា ៖ “ទាក់ទងនឹងប្រទេសចិន ខ្ញុំមិនបញ្ចូលប្រទេសចិនក្នុងផ្នែកនោះទេ។ អាជីវកម្មរបស់ពួកយើងនៅប្រទេសចិន គឺមានភាពខ្លាំងក្លានៅត្រីមាសចុងក្រោយ។ ពួកយើងមានកំណើន ១៦% ដែលយើងសប្បាយចិត្តនឹងលទ្ធផលនេះ។”
ប៉ុន្មានខែក្រោយមក គឺនៅខែមករា ឆ្នាំ២០១៩ លោក Tim Cook បានផ្ញើលិខិតទៅកាន់វិនិយោគិន ដែលបង្ហាញថាចំណូលរបស់ Apple សម្រាប់ត្រីមាសទីបួននៃឆ្នាំ២០១៨ អាចមានប្រមាណ ៨៤ពាន់លានដុល្លារ ទាបជាងការព្យាករណ៍ដែលមានចន្លោះពី ៨៩ ទៅ ៩៣ពាន់លានដុល្លារ។
ជាលទ្ធផលចំណូលដែល Apple រាយការណ៍នៅថ្ងៃទី២៩ ខែមករា ឆ្នាំ២០១៩ គឺ ៨៤,៣ពាន់លានដុល្លារ ហើយក្នុងលិខិតរបស់ខ្លួន លោក Tim Cook និយាយថាសកម្មភាពសេដ្ឋកិច្ចចុះខ្សោយនៅប្រទេសចិន គឺជាហេតុផលដែលចំណូលរបស់ Apple ទាបជាងការរំពឹង ដែលនាំឲ្យមានការថមថយនូវតម្រូវការ iPhone និងផលិតផលដទៃទៀត។
វិនិយោគិន បានចោទប្រកាន់ថា លោក Tim Cook បានដឹងថាតម្រូវការនៃ iPhone នៅប្រទេសចិនមានការថមថយ ក្នុងការប្រកាសអំពីស្ថានភាពហិរញ្ញវត្ថុកាលពីខែវិច្ឆិកា ឆ្នាំ២០១៨ ប៉ុន្តែមិនបានលើកឡើងពីរឿងនេះ។ ក្រុមហ៊ុន Apple បានច្រានចោលការចោទប្រកាន់នេះ ហើយ Apple យល់ព្រមដោះស្រាយវិវាទនេះដើម្បីជៀសវាងការចំណាយប្រាក់ និងពេលវេលាកាន់តែច្រើនលើរឿងក្ដីនេះ៕