ក្រុមហ៊ុន Apple គ្រោងបញ្ចេញលក់ iPad Pro និង iPad Air ថ្មីនៅអំឡុងចុងខែមីនា ឬក្នុងខែមេសាខាងមុខ។ នេះបើតាមលោក Mark Gurman នៃស្ថាប័នព័ត៌មាន Bloomberg។ លោកក៏បានរំពឹងវត្តមាន Magic Keyboard ថ្មីជាមួយ Apple Pencil ថ្មីប្រកាសចេញជាមួយគ្នាផងដែរ។
ពាណិជ្ជកម្ម
ក្នុងអត្ថបទដែលចេញផ្សាយថ្មីៗនេះ លោក Mark Gurman បានបញ្ជាក់ថា Apple កំពុងត្រៀមកំណែទម្រង់ថ្មីនៃ iPadOS 17.4 សម្រាប់ iPad ថ្មី ដែលមានន័យថាឧបករណ៍ថ្មីដែល Apple ប្រកាសចេញគឺនឹងចេញទន្ទឹមគ្នាជាមួយប្រព័ន្ធប្រតិបត្តិការថ្មី។ តទៅនេះជាការរំពឹងទុកនៃ iPad ថ្មី
- iPad Pro ថ្មី នឹងប្រើឈីប M3 ជាមួយអេក្រង់ OLED និងមានកាមេរ៉ាមុខប្រភេទផ្ដេក អមជាមួយសំណុំកាមេរ៉ាក្រោយដែលមានការផ្លាស់ប្ដូរថ្មី និងអាចសាកថ្មឥតប្រើខ្សែ MagSafe បានផងដែរ
- iPad Air ថ្មី នឹងប្រើឈីប M2 និងមានកាមេរ៉ាមុខប្រភេទផ្ដេក ហើយវានឹងមានជាទំហំ ១២,៩អ៊ីញ ជាលើកដំបូង
កន្លងមកលោក Mark Gurman និយាយថា Apple នឹងរៀបចំកម្មវិធីសម្រាប់ប្រកាសចេញ iPad ថ្មី ប៉ុន្តែផ្ទុយទៅវិញឧបករណ៍នេះនឹងត្រូវប្រកាសចេញលើវិបសាយរបស់ Apple ដូចជា MacBook Air ប្រើឈីប M3 ដែលបង្ហាញចេញកាលសប្ដាហ៍មុនដែរ៕