ស្មាតហ្វូនបត់សរុប ៤,២លានគ្រឿង បានចរាចរណ៍លក់លើទីផ្សារក្នុងត្រីមាសទីបួន នៃឆ្នាំ២០២៣ ដែលជាការកើនឡើង ៣៣% ធៀបនឹងកាលពីឆ្នាំ២០២២។ សម្រាប់ឆ្នាំនេះ អ្នកវិភាគនៃ Display Supply Chain Consultants បានប៉ាន់ស្មានថាទីផ្សារស្មាតហ្វូនបត់នឹងមានការផ្លាស់ប្ដូររយៈពេលខ្លី។
កាលពីត្រីមាសទីបួនឆ្នាំកន្លងទៅ Samsung ជាក្រុមហ៊ុនឈានមុខ ត្បិតថាការលក់នៃ Z Flip5 និង Z Fold5 សម្រេចបានទាបជាងការរំពឹងទុកក៏ពិតមែន។ ពេលនេះស្មាតហ្វូន Z-Series បានថមថយការចាប់អារម្មណ៍ ដោយសារតែការជិតមកដល់នៃ Z Flip6 និង Z Fold6។
ការថមថយនេះនឹងអនុញ្ញាតឲ្យ Huawei នាំមុខ Samsung ជាលើកដំបូង។ នេះបើតាមការលើកឡើងរបស់អ្នកវិភាគនៃ Display Supply Chain Consultants។ Huawei នឹងឡើងកូដជាមួយជោគជ័យនៃ Huawei Mate X5 និង Huawei Pocket 2។
យ៉ាងណាក្ដី ការផ្លាស់ប្ដូរតំណែងលេខ១ និងលេខ២ នេះ នឹងកើតមានបណ្ដោះអាសន្នប៉ុណ្ណោះ ដោយ Samsung រំពឹងថានឹងអាចឡើងគ្រងតំណែងលេខមួយវិញ ក្រោយការប្រកាសចេញ Z Flip6 និង Z Fold6 ហើយគេជឿជាក់ថា Samsung នឹងនៅតែអាចគ្រងតំណែងលេខមួយបើគិតពេញមួយឆ្នាំ២០២៤។
ក្រៅពីការប្រកាសចេញស្មាតហ្វូនបត់របស់ Samsung ក្រុមហ៊ុន Huawei ក៏អាចនឹងប្រកាសចេញស្មាតហ្វូនបត់ពីរម៉ូដែលផងដែរ ខណៈ Motorola និង Honor ក៏នឹងមានម៉ូដែលថ្មីដូចគ្នា៕