ក្រុមហ៊ុន Nothing បានប្រកាសចេញស្មាតហ្វូនលំដាប់ថវិកា Phone (2a) កាលពីដើមខែមីនា ហើយពេលនេះវាបានចេញលក់លើទីផ្សារមួយចំនួនជាផ្លូវ ដោយទទួលបានជោគជ័យគួរកត់សម្គាល់ ក្នុងពេល១ម៉ោង អាចលក់ចេញបានជាង ៦ម៉ឺនគ្រឿង។
ក្រុមហ៊ុន Nothing ក៏បានទម្លាក់កំណែទម្រង់ Nothing OS 2.5.3 សម្រាប់ Phone (2a) ដែលមកជាមួយនូវការគាំទ្រមុខងារ Ultra XDR ក្នុងកាមេរ៉ា, ការពង្រឹងលើកម្មវិធីកាមេរ៉ា និងនាំមកនូវការពង្រឹងលើ HDR, ពណ៌ ក៏ដូចជាភាពច្បាស់នៃកាមេរ៉ាមុខផងដែរ។
Nothing Phone (2a) មានប្រើប្រាស់ឈីប Dimensity 7200 Pro ដែលសហការបង្កើតឡើងជាមួយ MediaTek ដោយវាជាឈីបទំហំ 4nm និងមានកម្លាំងរត់ដល់ 2.8GHz ឯណោះ។
វាមានអេក្រង់ ៦,៧៨អ៊ីញ ជាប្រភេទ 10-bit AMOLED អាចបង្ហាញរូបកម្រិត 1084x2412px អាចបាញ់ពន្លឺបាន 1300nits និងមាន Refresh Rate ចាប់ពី 30 ទៅ 120Hz។
កាមេរ៉ាបំពាក់លើស្មាតហ្វូននេះមានសរុប ៣គ្រាប់ ដោយនៅផ្នែកខាងក្រោយជាកាមេរ៉ាភ្លោះទំហំ 50MP ដូចគ្នា និងខាងមុខមានកាមេរ៉ា Selfie ទំហំ 32MP ដូចនៅលើ Nothing Phone (2) ដែរ។
Nothing Phone (2a) មានបំពាក់ថ្មទំហំដល់ 5000mAh អាចសាកល្បឿន 45W ដែលសាក ៥០% ក្នុងពេល ២៣នាទី និងសាក ១០០% ក្នុងពេល ៥៩នាទី។ Nothing និយាយថា ថ្មរបស់វាអាចនៅមានសុខភាព ៩០% ក្រោយសាក ១០០០ដង ឬក្រោយឆ្លងកាត់ការប្រើជាប្រចាំរយៈពេល ៣ឆ្នាំ។
Nothing Phone (2a) មានពីរជម្រើស 8GB RAM /128GB ROM ដែលមានតម្លៃប្រមាណ ៣៥៦ដុល្លារ នៅអឺរ៉ុប និងមួយទៀតគឺ 12GB RAM / 256GB ROM ដែលមានតម្លៃប្រមាណ ៤១១ដុល្លារ លើទីផ្សារអឺរ៉ុប៕