កាលពីថ្ងៃសុក្រកន្លងទៅនេះ ក្រុមហ៊ុនរថយន្ត General Motors Co. បានបង្ហាញឡូហ្គោថ្មីមួយ ដែលជាការផ្លាស់ប្តូរដ៏សំខាន់លើកដំបូងរបស់ខ្លួន ហើយផ្នែករថយន្តស្វ័យយ័តរបស់ក្រុមហ៊ុននេះ ក៏បានជួលប្រធានប្រតិបត្តិការថ្មី ដែលជាកិច្ចខិតខំប្រឹងប្រែងចុងក្រោយបង្អស់របស់ក្រុមហ៊ុនខាងលើ។
ប្រធានផ្នែកទីផ្សារពិភពរបស់ក្រុមហ៊ុន General Motors អ្នកស្រី Deborah Wahl បាននិយាយថា ក្រុមហ៊ុនបានបង្ហាញឡូហ្គោថ្មីដែលមានអក្សរ “gm” ជាអក្សរតូច នៅក្នុងពុម្ពអក្សរបែបសហសម័យ ហើយត្រូវបានរចនាឡើងឲ្យកាន់តែងាយស្រួលមើល។
គួរឲ្យដឹងថា ក្រុមហ៊ុនគ្រោងនឹងបញ្ចូលឡូហ្គូថ្មីនេះនៅក្នុងយុទ្ធនាការផ្សាយពាណិជ្ជកម្មនាពេលខាងមុខ ដែលនឹងបង្ហាញពីគំរូរថយន្តអគ្គិសនីនាពេលអនាគត។
យ៉ាងណាមិញ ក្រុមហ៊ុន General Motors កំពុងផ្តោតលើយុទ្ធសាស្រ្តកំណើនរបស់ខ្លួន លើយានយន្តអគ្គិសនី និងរថយន្តស្វ័យយ័ត ទោះបីជាការខិតខំប្រឹងប្រែងនោះ មិនទាន់បានទាញការយកចិត្តទុកដាក់របស់វិនិយោគិនក៏ដោយ៕