ក្រុមហ៊ុនអាកាសចរណ៍ Thai AirAsia (TAA) កំពុងចាត់ទុកថា ការផ្ទុះឡើងនៃជំងឺកូវីដ១៩ ចុងក្រោយបង្អស់នេះ គឺជាវិបត្តិដ៏អាក្រក់បំផុតសម្រាប់អាកាសចរណ៍នៅក្នុងប្រទេសថៃ ខណៈក្រុមហ៊ុននេះកំពុងប្រឈមនឹងសម្ពាធច្រើនជាងអំឡុងពេលបិទប្រទេស កាលពីឆ្នាំមុនទៅទៀត។
លោក Tassapon Bijleveld ប្រធាននាយកប្រតិបត្តិនៃក្រុមហ៊ុន Asia Aviation (AAV) ដែលជាម្ចាស់ភាគហ៊ុនធំជាងគេរបស់ Thai AirAsia បានមានប្រសាសន៍ថា “ការធ្វើដំណើរបានធ្លាក់ចុះទាបជាងឆ្នាំមុន។ លើកនេះខុសពីមុន ព្រោះមនុស្សភាគច្រើនលុបចោលគម្រោងធ្វើដំណើររបស់ពួកគេ បើទោះបីជាមិនមានការបិទប្រទេសពីរដ្ឋាភិបាលក៏ដោយ”។
គួរឲ្យដឹងថា ចំនួនជើងហោះហើរក្នុងស្រុករបស់ Thai AirAsia បានថយចុះជាង ៥០% ដោយសារវាត្រូវដាក់ជើងហោះហើរបញ្ចូលគ្នា និងលុបចោលជើងហោះហើរជាច្រើន។
លោក Tassapon បានបន្តថា ជើងហោះហើរខ្លះមានអ្នកដំណើរត្រឹមតែ ២០-៣០ នាក់ប៉ុណ្ណោះ ដែលផ្ទុយស្រឡះកាលពី ២ ខែមុន។
“យើងទើបតែស្ទុះងើបឡើងវិញពីការបិទប្រទេសលើកដំបូង កាលពីឆ្នាំមុន។ ទោះបីមិនមានប្រាក់ចំណេញក៏ដោយ យ៉ាងហោចណាស់យើងអាចមានលំហូរប្រាក់ចំណូលថេរពីទីផ្សារក្នុងស្រុក។ ប៉ុន្តែការផ្ទុះឡើងនៃករណីថ្មីបានបំផ្លាញយើង”។ នេះបើតាមសម្តីលោកបានប្រាប់បន្ថែម៕