អ្នកឌីហ្សាញដ៏ល្បីម្នាក់ នៅក្រុមហ៊ុន Apple ដែលជាមនុស្សក្រោមបង្គាប់របស់ អតីតអ្នកឌីហ្សាញដ៏ឆ្នើម Jony Ive សម្រេចចាកចេញពី Apple ក្រោយបម្រើការអស់រយៈពេល ១៧ឆ្នាំ។ នេះបើយោងទៅតាម Bloomberg។
ការចាកចេញនេះ របស់លោក Peter Russell-Clarke គឺដើម្បីបន្តគម្រោងចំណង់ចំណូលចិត្តរបស់ខ្លួន។ ជំហានបន្ទាប់ គាត់នឹងទៅចូលរួមជាមួយក្រុមហ៊ុន អវកាសឯកជន Vast ដែលមានតួនាទីជា ទីប្រឹក្សាដ៏ធំ។
រំលឹកការងារពេលនៅ Apple លោក Russell-Clarke ធ្វើការក្រោមលោក Jony Ive ដែលលោកធ្វើការលើ iPhone, iPad, Mac, Apple Watch, និង Apple Park។
តើនរណាទៅជា Jony Ive ដែលជាមេរបស់លោកកន្លងមក?
លោក Jony Ive អតីតប្រធានផ្នែករចនារបស់ Apple ដោយលោកជាអតីតបុគ្គលដ៏សំខាន់ និងមានស្នាដៃម្នាក់នៅ Apple ត្បិតផលិតផលរបស់ក្រុមហ៊ុននេះជាច្រើន រួមមាន MacBook Pro, iMac, MacBook Air, iPod, iPod Touch, iPhone, iPad, iPad Mini និងប្រព័ន្ធប្រតិបត្តិការ iOS សុទ្ធតែបានឆ្លងកាត់ស្នាដៃឌីហ្សាញរបស់គាត់ទាំងអស់។ គាត់បានបម្រើការនៅ Apple អស់រយៈពេល ២៩ឆ្នាំ និងបានលាឈប់នៅ ខែវិច្ឆិកា ឆ្នាំ២០១៩ ទៅបើកក្រុមហ៊ុនផ្ទាល់ខ្លួន មានឈ្មោះថា LoveFrom
គួរដឹងថា អ្នករចនារបស់ Apple ជាច្រើនបានលាឈប់ពី Apple ទៅចូលរួមការងារជាមួយ Ive កាលពីខែកុម្ភៈ ឆ្នាំ២០២៣ កន្លងទៅ៕