ទោះបីជាក្រុមហ៊ុន Tesla កំពុងតែទិញអាគុយលីចូមសម្រាប់ប្រើលើរថយន្តអគ្គិសនីរបស់ខ្លួន ពីក្រុមហ៊ុនចិន Gangfeng Lithium ក៏ដោយ ក៏ក្រុមហ៊ុនផលិតរថយន្តអគ្គិសនីអាមេរិកមួយនេះ បានចុះហត្ថលេខាលើកិច្ចព្រមព្រៀង ៥ ឆ្នាំ ជាមួយក្រុមហ៊ុនផ្គត់ផ្គង់អាគុយលីចូមចិនមួយទៀត គឺ Yahua Industrial Group។
Yahua Industrial Group ដែលមានមូលដ្ឋាននៅខេត្ត Sichuan ប្រទេសចិន ឥឡូវនេះនឹងបញ្ជូនអាគុយលីចូម (battery-grade lithium hydroxide) ទៅឲ្យក្រុមហ៊ុន Tesla ដែលចាប់ផ្តើមនៅឆ្នាំ ២០២១ និង រហូតដល់ឆ្នាំ ២០២៥។ តម្លៃសរុបនៃកិច្ចសន្យាត្រូវបានគេនិយាយថា មានចំនួន ៦៣០-៨៨០ លានដុល្លារ។ នេះបើយោងតាមសារព័ត៌មាន Reuters។
ទោះជាយ៉ាងណាក៏ដោយ ក្រុមហ៊ុន Tesla ដែលបានចាប់ផ្តើមចែកចាយរថយន្តពីរោងចក្រ Gigafactory នៅក្នុងទីក្រុងសៀងហៃ មិនទាន់បានធ្វើអត្ថាធិប្បាយអំពីកិច្ចព្រមព្រៀងនេះនៅឡើយទេ។
គួរឲ្យដឹងដែរថា កាលពីខែឧសភាកន្លងទៅ ក្រុមហ៊ុន Yahua បានបើករោងចក្រផលិតអាគុយលីចូម ដែលមានសមត្ថភាពអាចផលិតបានចំនួន ២០ ០០០ តោនក្នុងមួយឆ្នាំ ដែលច្រើនជាងពីមុនទ្វេដង បើទោះបីជាជំងឺកូវីដ១៩ បានធ្វើឲ្យប៉ះពាល់ដល់តម្រូវការក៏ដោយ៕