[ទីផ្សារបរទេស] ខណៈដែលចំនួនលក់នៃរថយន្តអគ្គិសនីនៅប្រទេសចិនបន្តមានការកើនឡើង ប៉ុន្តែគេសង្កេតឃើញថារថយន្ត Hybrid កំពុងតែមានសន្ទុះទីផ្សារខ្លាំងជាងដោយសារតែតម្លៃធូរថ្លៃរបស់វា។
ជាក់ស្ដែង ចំនួនលក់រថយន្ត PHEV មានការកើនឡើង ៧២% អំឡុងខែមករា ដល់ខែកញ្ញាឆ្នាំ២០២៣ នេះ ដោយមានចំនួនលក់សរុប ១ ៣៧០ ៣២៤គ្រឿង។ ចំណែករថយន្ត Hybrid ប្រភេទ EREV ឯណោះវិញ មានចំនួនលក់កើនឡើង ១៥៧% ជាមួយចំនួនលកើសរុបកើនពី ១៥៣ ៩២៥គ្រឿង ដល់ ៣៩៥ ៣៩០គ្រឿង។
ជាការប្រៀបធៀប ចំនួនលក់រថយន្តអគ្គិសនីសុទ្ធ មានការកើនឡើងត្រឹមតែ ១៤% ប៉ុណ្ណោះ ដោយលក់បានសរុប ៣ ៥០៣ ៣៦៦គ្រឿង ឯរថយន្តម៉ាស៊ីនប្រេងឥន្ធនៈ មានការថយចុះចំនួនលក់ ១១% មកនៅត្រឹម ៩ ៤៩៨ ៧៩៣គ្រឿង។
ក្នុងចំណោមក្រុមហ៊ុនរថយន្តក្នុងស្រុកដែលមានដាក់លក់រថយន្ត PHEV ឃើញថាក្រុមហ៊ុន BYD វ៉ាដាច់គូប្រជែងតែម្ដង ដោយក្នុងចំណោមរថយន្តលក់ដាច់ជាងគេទាំង១០ម៉ូដែល មាន៨ម៉ូដែលជាម៉ាក BYD។ ចំណែកក្រុមហ៊ុន Li Auto នាំមុខ ជាមួយរថយន្តប្រភេទ EREV។
ដោយឡែក បើងាកទៅមើលចំនួនលក់នៃរថយន្ត Hybrid ធម្មតា ឃើញថាចំនួនលក់មានការថយចុះ ១៥% ឯណោះ ដោយមានចំនួនលក់សរុប ៥២៥ ០៩៦គ្រឿង ជាដំណឹងមិនល្អមួយសម្រាប់ក្រុមហ៊ុនដែលផ្ដោតលើការលក់រថយន្ត Hybrid ធម្មតា៕