[ទីផ្សារបរទេស] ក្រុមហ៊ុន Honda បាននាំយករថយន្ត SUV ម៉ូដែល WR-V ពីរោងចក្រនៅប្រទេសឥណ្ឌា យកទៅលក់លើទឹកដីប្រទេសជប៉ុន ដែលជាផលិតដំបូងបំផុតនាំចូលពីប្រទេសឥណ្ឌា។
បញ្ជាក់ថារថយន្ត WR-V នេះ មិនដូចជាម៉ូដែលដែលដាក់លក់នៅអាស៊ីអាគ្នេយ៍ដូចជានៅម៉ាឡេស៊ី ឬ ឥណ្ឌូណេស៊ីនោះទេ ផ្ទុយទៅវិញវាគឺជារថយន្តម៉ូដែល Elevate ដែលបានប្រកាសចេញនៅឥណ្ឌាកាលពីខែមិថុនា ពោលគឺគ្រាន់តែប្ដូរឈ្មោះថា WR-V ប៉ុណ្ណោះ។
Honda នៅមិនទាន់ប្រកាសអំពីលក្ខណៈសម្បត្តិពេញនៃ WR-V លក់នៅជប៉ុននៅឡើយទេ ដោយព័ត៌មានរំពឹងថានឹងប្រកាសចេញនៅខែធ្នូ។ រថយន្ត WR-V នេះនឹងមានបីប្រភេទ ដោយប្រើម៉ាស៊ីន ១,៥លីត្រ i-VTEC ទំហំ ៤ស៊ីឡាំង ប្រើជាមួយប្រអប់លេខ CVT និងប្រព័ន្ធបើកបរវិលកង់មុខ។
ផ្នែកខាងក្នុងនៃរថយន្តនេះ ស្រដៀងនឹងប្រភេទដែលលក់នៅឥណ្ឌាដែរ ដោយមានអេក្រង់កម្សាន្តទំហំ ១០,២៥អ៊ីញ ជាមួយកុងទ័រឌីជីថល ៧អ៊ីញ និងមានម៉ាស៊ីនត្រជាក់ស្វ័យប្រវត្តិ។
គ្រោងដាក់លក់នៅឆ្នាំ២០២៤ រថយន្ត WR-V រំពឹងថានឹងមានតម្លៃក្រោម ១៣ ៥០០ដុល្លារ ដោយមានជាប្រភេទ X, Z និង Z+ ហើយអតិថិជនអាចរើសយកទឹកថ្នាំចំនួន ៥ពណ៌ រួមជាមួយគ្រឿងបរិក្ខារដែលអាចបន្ថែមបាន៕