[ទីផ្សារបរទេស] បុរសម្នាក់ឈ្មោះថា Mitch Dumke បានចែករំលែករឿងរ៉ាវគួរឲ្យចាប់អារម្មណ៍មួយ ជាមួយរថយន្ត Rivian R1T ដែលខ្លួនបានប្រើប្រាស់អស់រយៈពេល ១៥ខែ និងបានប្រើបានចម្ងាយជិត ៤ម៉ឺនគីឡូម៉ែត្រ។
ក្នុងវីដេអូរយៈពេល២២នាទី បុរសរូបនេះបាននិយាយថា Rivian R1T ជារថយន្តភីកអាប់អគ្គិសនីល្អមួយសម្រាប់ខ្លួន ប៉ុន្តែវាមិនល្អឥតខ្ចោះនោះទេ ព្រោះថារយៈពេលកន្លងមករូបលោកបានជួបនឹងបញ្ហាមួយចំនួន ដោយមានចំនួន ៤លើក ដែលរូបលោកត្រូវការរថយន្តមកស្ទូចរថយន្តរបស់ខ្លួនដោយសារកំហុសបច្ចេកទេសដែលកើតឡើងជាមួយប្រព័ន្ធបើកបរ ឬជាមួយហ្វ្រាំងចតរថយន្ត ដែលធ្វើឲ្យរថយន្តមិនអាចដំណើរការបាន។
អ្វីដែលគួរឲ្យសរសើរនោះគឺថា សេវាកម្មបម្រើអតិថិជនរបស់ក្រុមហ៊ុន Rivian គឺពិតជាអស្ចារ្យមែនទែន ព្រោះថារាល់ពេលដែលរថយន្តរបស់លោកជួបបញ្ហាមិនអាចបើកទៅមុខបាន Rivian តែងតែរៀបចំរថយន្តស្ទូចជាបន្ទាន់តែម្ដង ហើយក្រុមហ៊ុនក៏បានចេញថ្លៃធ្វើដំណើរសម្រាប់ការជិះ Uber ឬ Lyft ត្រឡប់មកផ្ទះពេលរថយន្តខូចជាដើម។
បន្ទាប់ពីជួបបញ្ហាដែលតម្រូវឲ្យ Mitch ជិះរថយន្តជួលរយៈពេលប្រមាណ ៤៥ថ្ងៃ ក្នុងចន្លោះពេល ៣ ទៅ ៤ខែ នោះ នៃការប្រើរថយន្ត Rivian R1T នេះ ម្ចាស់រថយន្តក៏បានសម្រេចនិយាយជាមួយក្រុមហ៊ុន Rivian ហើយក្រុមហ៊ុនបានយល់ព្រមទទួលទិញរថយន្តត្រឡប់វិញក្នុងតម្លៃពេញតែម្ដង។
ការទិញយកវិញក្នុងតម្លៃពេញនេះ Mitch គិតថាគឺព្រោះតែបញ្ហាដែលកើតមានលើរថយន្តរបស់ខ្លួនគឺជាបញ្ហាកម្រ ហើយក្រុមហ៊ុនចង់យកទៅសិក្សាបន្ថែមអំពីកំហុសបច្ចេកទេសទាំងនេះ៕