[ទីផ្សារបរទេស] រថយន្តអគ្គិសនី Volkswagen ID.3 បានទទួលការសរសើរពីសមាគមន៍យានយន្តធំនៅអឺរ៉ុបឈ្មោះថា ADAC ក្រោយពីរថយន្តបានឆ្លងកាត់ការធ្វើតេស្តចម្ងាយ ១០ម៉ឺនគីឡូម៉ែត្រ ដែលជាការធ្វើតេស្តមានរយៈពេល ២ឆ្នាំកន្លះ។
វិស្វករនៅ ADAC បានប្រើប្រាស់រថយន្ត Volkswagen ID.3 ឲ្យវិលកង់បានចម្ងាយ ១០ម៉ឺនគ.ម និងបានរកឃើញថាអាគុយទំហំ ៧៧kWh របស់វា នៅមានសមត្ថភាពផ្ទុកថាមពលបាន ៩៣% ដោយមិនមានបង្ហាញភាពខុសប្រក្រតីអ្វីឡើយ។
លទ្ធផលនេះគឺល្អប្រសើរខ្លាំង បើធៀបនឹងតួលេខលើសពី ៧០% ដែល Volkswagen បានធានា ដោយវាគឺជាផ្នែកនៃការធានាលើរថយន្តថ្មីរបស់ Volkswagen ក្នុងរង្វង់រយៈពេល៨ឆ្នាំ ឬ ១០ម៉ឺនម៉ាយនៃចម្ងាយបើកបរ។
ADAC និយាយថាអ្នកធ្វើតេស្តរបស់ខ្លួន មិនបានការពារអាគុយ និងតែងតែសាកដល់ ១០០% នៅស្ថានីយសាកភ្លើងល្បឿនលឿន ដើម្បីឆាប់សម្រេចបានការវិលកង់បានចម្ងាយ ១០ម៉ឺនគីឡូម៉ែត្រ។ Volkswagen ណែនាំថាសាកភ្លើងលឿនត្រឹមតែ ៨០% បានហើយ ដើម្បីពន្យារអាយុកាលអាគុយ៕