[ទីផ្សារបរទេស] ពេលដែល Toyota បង្ហាញចេញរថយន្ត Prius ជំនាន់ទីប្រាំ គេឃើញមានប្រតិកម្មយ៉ាងខ្លាំងក្លាទាក់ទងនឹងសមត្ថភាព និងរូបរាងដ៏ទាន់សម័យរបស់វា។ អតិថិជននៅអង់គ្លេសមានការខកចិត្តខ្លាំង បន្ទាបពីដឹងថាពួកគេមិនអាចទិញរថយន្តនេះ ប៉ុន្តែពេលនេះសង្ឃឹមចាប់ផ្ដើមមានវិញហើយ។
រថយន្ត Prius នឹងមានដាក់លក់នៅអង់គ្លេស បន្ទាប់ពីបាត់មុខពីសែស្រឡាយរថយន្ត Toyota ក្នុងឆ្នាំ២០២៣នេះ។ ការសម្រេចចិត្តមិនលក់ Prius នៅអង់គ្លេស ត្រូវបាន Toyota លើកយករថយន្តតួខ្ពស់ SUV និង Crossover ថាជាដើមហេតុ។
ពេលនេះដែរ ជាមួយតម្រូវការខ្លាំងក្លាលើរថយន្ត Hybrid អាចជាកត្តាបណ្ដាលឲ្យ Toyota ដាក់លក់ Prius នៅអង់គ្លេសជាថ្មី។ នេះបើតាមការចុះផ្សាយរបស់ Autocar។ ត្បិតថាហេតុផលពិតប្រាកដមិនត្រូវបានបង្ហាញ ប៉ុន្តែរថយន្ត Prius ច្បាស់ជាពេញចិត្តអតិថិជនដែលចង់បានរថយន្តសន្សំសំចៃសាំង និងមានរូបរាងទាក់ទាញ។
រថយន្ត Prius ថ្មី មានទាំងប្រភេទ Hybrid និងប្រភេទ PHEV សម្រាប់ម៉ូដែលសកលលោក។ យ៉ាងណាក្ដី នៅអឺរ៉ុបនឹងមានតែប្រភេទ PHEV ប៉ុណ្ណោះ ដោយវាប្រើម៉ាស៊ីន ២,០លីត្រ ៤ស៊ីឡាំង ជាមួយម៉ូទ័រអគ្គិសនីមួយ អាចផលិតកម្លាំងបានសរុប ២២០សេះ។ អាគុយទំហំ ១៣,៦kWh អាចបើកដោយប្រើអគ្គិសនីសុទ្ធបានដល់ចម្ងាយ ៨៥គ.ម ផងដែរ៕