[ទីផ្សារបរទេស] ក្នុងពេលដែលឧស្សាហកម្មយានយន្តខិតខំកែសម្រួលសង្វាក់ផលិតកម្មដោយប្រើប្រាស់រ៉ូបូតកាន់តែច្រើនដើម្បីបន្ថយការចំណាយលើការផលិតនោះ នៅមានក្រុមហ៊ុនរថយន្តមួយចំនួនដែលនៅផលិតរថយន្តដោយដៃមនុស្សផ្ទាល់នៅឡើយ ក្នុងនោះមានដូចជា Bugatti ជាដើម។
ក្នុងការចុះផ្សាយមួយ Bugatti បានរៀបរាប់ឲ្យដឹងអំពីភាពល្អិតល្អន់នៃការលាបថ្នាំរថយន្តដោយប្រើប្រាស់ដៃមនុស្សផ្ទាល់ ជាកិច្ចការមួយដែលចំណាយពេលប្រហែល ៦០០ម៉ោង ទៅ ៧០០ម៉ោង ឬប្រហែលជិតមួយខែឯណោះ។
ក្នុងរយៈពេលដូចគ្នានេះ Bugatti និយាយថា ក្រុមហ៊ុនផលិតរថយន្តប្រណីត អាចផលិតរថយន្តបាន ៤ ទៅ ៥ គ្រឿងពីដើមដល់ចប់។ គ្រឿងបន្លាស់នីមួយៗលើរថយន្ត Bugatti ថ្មី បានលាបថ្នាំម្ដងមួយៗ និងមិនត្រូវបានដំឡើងលើរថយន្តដោយផ្ទាល់ឡើយ ដែលធ្វើដូចនេះដើម្បីទទួលបានការលាបដ៏ស្អាតល្អ។ នេះគឺជារឿងមួយ ដែលក្រុមហ៊ុនផលិតរថយន្តទ្រង់ទ្រាយធំ មិនធ្វើវាឡើយ។
លើសពីនេះដែរ មុនការលាបទឹកថ្នាំស្រទាប់ដំបូង គេត្រូវលាបទឹកថ្នាំរលោងថ្លាជាមុនសិន ហើយមុនហ្នឹងទៅទៀត អ្នកជំនាញ ធ្វើការត្រួតពិនិត្យដើម្បីស្វែងរកចំណុចដែលកំពិត ឬខុសប្រក្រតី ដោយដំណើរការនេះ មិនជាប់ទាក់ទងនឹងការប្រើម៉ាស៊ីន ឬរ៉ូបូតឡើយ គឺប្រើប្រាស់ភ្នែកមនុស្សផ្ទាល់។ ក្រោយមកគេត្រូវលាបស្រទាប់ថ្នាំរលោងពីរជាន់ទៀត។
ការត្រៀមទាំងនេះគឺត្រូវចំណាយពេលជាង ១០០ម៉ោងលើរថយន្តនីមួយៗ ប៉ុន្តែផ្ទៃនៃគ្រឿងបន្លាស់រថយន្តមិនទាន់ត្រៀមរួចរាល់សម្រាប់ការលាបពណ៌ថ្នាំឡើយ ដោយគេត្រូវលាបទឹកថ្នាំរលោង និងខាត់ ជាច្រើនលើកច្រើនសាទៀត។ ក្រោយពីផ្ទៃនៃគ្រឿងបន្លាស់រលោងស្អាតហើយ អ្នកជំនាញអាចបន្តទៅជំហានបន្ទាប់ ប៉ុន្តែមិនទាន់ដល់ការលាបពណ៌ចុងក្រោយឡើយ។
ក្រុមការងារត្រូវធ្វើការវិភាគលើគ្រឿងបន្លាស់នីមួយៗ ព្រោះថា Bugatti ប្រើប្រាស់វត្ថុធាតុដើមផ្សេងៗគ្នាលើតួខ្លួនរថយន្ត ហើយវត្ថុធាតុដើមគឺមានការលាបខុសៗពីគ្នា។ ក្រោយពីលាបថ្នាំបានស្អាតហើយ គេត្រូវចំណាយពេល ៤ថ្ងៃបន្ថែមទៀត ដើម្បីធ្វើការប៉ូលា ដែលការប៉ូលានេះ Bugatti និយាយថាជាការប៉ូលាដ៏ស្មុគស្មាញជាងគេក្នុងឧស្សាហកម្មយានយន្តទាំងមូល។ សរុបជារួម ការលាបថ្នាំរថយន្ត Bugatti គឺចាយពេលចន្លោះពី ៦០០ម៉ោង ទៅ ៧០០ម៉ោង៕