កាលពីថ្ងៃច័ន្ទ ទី២១ ខែធ្នូ ឆ្នាំ២០២០ នេះ ក្រសួងហិរញ្ញវត្ថុជប៉ុន បានឲ្យដឹងថា គណៈរដ្ឋមន្រ្តីជប៉ុនបានអនុម័តនូវសេចក្តីព្រាងថវិកាចំនួន ១,០៣ ពាន់ពាន់លានដុល្លារ សម្រាប់ឆ្នាំសារពើពន្ធបន្ទាប់ ដែលចាប់ផ្តើមនៅក្នុងខែមេសា ឆ្នាំ ២០២១ ខណៈដែលជំងឺឆ្លងកូវីដ១៩ បានដាក់សម្ពាធលើហិរញ្ញវត្ថុសាធារណៈដ៏ធ្ងន់ធ្ងររួចទៅហើយ។
ថវិកាប្រចាំឆ្នាំ ១០៦,៦ ពាន់ពាន់លានយ៉េន ឬស្មើនឹង ១,០៣ ពាន់ពាន់ដុល្លារ បានកើនឡើង ៤ ភាគរយពីកម្រិតដំបូងនៃឆ្នាំនេះ និងកើនឡើងរយៈពេល ៩ ឆ្នាំជាប់គ្នា ដោយបំណុលថ្មីមានតម្លៃ ៤៣,៦ ពាន់ពាន់លានយ៉េន ស្មើនឹង ៤០,៩ ភាគរយនៃប្រាក់ចំណូល។
អ្នកធ្វើគោលនយោបាយនៅទូទាំងពិភពលោក បានបញ្ចេញសកម្មភាពជំរុញរូបិយវត្ថុ និងសារពើពន្ធ ដើម្បីទប់ស្កាត់ការធ្លាក់ចុះសេដ្ឋកិច្ចដ៏ជ្រៅ និងអូសបន្លាយពេល ដោយសារតែជំងឺរាតត្បាតកូវីដ១៩ បានបិទព្រំដែនអន្តរជាតិ ហើយបានបណ្តេញមនុស្សជាច្រើនចេញពីការងារ។
នៅប្រទេសជប៉ុន កំណែទម្រង់សារពើពន្ធត្រូវបានទុកចោល ខណៈដែលនាយករដ្ឋមន្រ្តី Yoshihide Suga បានផ្តល់អាទិភាពដល់កិច្ចខិតខំប្រឹងប្រែង ដើម្បីទប់ទល់នឹងជំងឺរាតត្បាតកូវីដ១៩ និងជំរុញកំណើនសេដ្ឋកិច្ច ដើម្បីបង្កើនប្រាក់ចំណូលពន្ធឡើងវិញ។
គួរឲ្យដឹងថា ផែនការចំណាយខាងលើនេះ ត្រូវតែអនុម័តដោយសភានៅដើមឆ្នាំក្រោយ៕