បន្ទាប់ពីបញ្ចេញ Galaxy S21 FE (Fan Edition) ពេលនេះ Samsung ទើបបញ្ចេញស្មាតហ្វូន Galaxy S23 FE ជាមួយតម្លៃត្រឹមតែ ៥៩៩ដុល្លារ (8GB/128GB)។ ម៉ូឌែលសម្រាប់ហ្វេននេះ មានពណ៌ស្រស់ គឺពណ៌ក្រូចខ្វិច ខៀវស្រាល ស្វាយ បៃតងស្រាល ស និងខ្មៅ។
Samsung ក៏បានអាប់ឌែតបន្តិចបន្ដួចចំពោះម៉ូឌែលនេះដែរ គឺបំពាក់បន្ទះឈីបខ្លាំង Snapdragon 8 Gen 1 សម្រាប់ទីផ្សារសហរដ្ឋអាមេរិច និង Exynos 2200 សម្រាប់ប្រទេសខ្លួន និងទីផ្សារនាំចេញ។ ការបន្ថែមទៀត គឺទៅលើកាមេរ៉ាឡើងដល់ 50MP ដោយអាប់ឌែតពី 12MP មក។ រីឯ RAM ក៏ឡើងដល់ 8GB ខណៈម៉ូឌែលមុនប្រើត្រឹម 6GB ប៉ុណ្ណោះ។
រីឯទំហំទូរសព្ទនៅរក្សាដដែល ៦,៤អ៊ិញ ជាប្រភេទអេក្រង់កម្រិតខ្ពស់ Dynamic AMOLED 2X មានកម្រិតបង្ហាញ FHD+ និង 60-120Hz refresh rate។
Galaxy S23 FE មានទម្ងន់ខ្លួន 209g ដំណើរការដោយ Android 13/One UI 5.1 ចេញពីប្រអប់ បំពាក់ថាមពលថ្មដដែល ៤៥០០មីលីអំពែម៉ោង ទ្រទ្រង់កម្លាំងសាក 25W អាចសាកពី ០ដល់៥០% ចំណាយពេល ៣០នាទី និងអាចសាកបានតាមខ្សែផងដែរ៕
