ខណៈលេចឮដំណឹងមកថា Galaxy S24 Ultra នឹងប្រកាសចេញជាផ្លូវការ នាថ្ងៃទី១៨ ខែមករា ឆ្នាំ២០២៤ ពេលនេះ លេចចេញដំណឹងបន្ថែមទៀតពីស្មាតហ្វូនកំពូលមួយនេះ ពីប្រភពធំៗជាច្រើន។
បើយោងទៅតាមរូបភាពលេចធ្លាយទាំងនោះ ម៉ូឌែលកំពូលរបស់ត្រកូល S បន្តរក្សាប្រើរូបរាងដូចជំនាន់មុនដែលជា Galaxy S23 Ultra ប៉ុន្ដែក៏មានប្លែកដែរ ត្បិតគេបានលើកឡើងថា វានឹងបំពាក់ស៊ុមការពារថ្មី ជាប្រភេទទីតានីញ៉ូម ជំនួសសារធាតុអាលុយមីញ៉ូម ដែលធ្លាប់ប្រើកន្លងមក។
ក៏ដដែលផងដែរចំពោះអេក្រង់គុណភាពខ្ពស់ WQHD+ ជាប្រភេទ Dynamic AMOLED LTPO ទំហំ ៦,៨អ៊ិញ ប៉ុន្ដែគេរំពឹងថាវានឹងអាចតម្លើងពន្លឺកាន់តែភ្លឺខ្លាំងទៅដល់ 2200 nits និងមានគែមអេក្រង់កាន់តែខ្លីជាមុនថែមទៀតផង។
ចំពោះកម្លាំងម៉ាស៊ីន វានៅតែប្រើបន្ទះឈីបពិសេសសម្រាប់តែ Galaxy Phone ពី Qualcomm គឺឈីបថ្មី Snapdragon 8 Gen 3 For Galaxy និងមានបំពាក់ Ram ឡើងដល់ 16GB និងទំហំផ្ទុកលោតដល់ 2TB ឯណោះ។
អ្វីដែលកាន់តែប្លែក និងហាក់ស្រឡាំងកាំងដល់អ្នកប្រើចំពោះដំណឹងចចាមអារ៉ាមនេះ គឺលេចឮមកថា Samsung នឹងរុះរើសប្រព័ន្ធកាមេរ៉ាក្រោយ ត្បិតនឹងផ្លាស់លែនពង្រីកចម្ងាយឆ្ងាយ គឺលែន Telephoto 10x មកបំពាក់លែនខ្លី ត្រឹម 3x និង 5x។ ដោយ 10MP មានកម្រិតពង្រីក 3x ជាលែន telephoto និងលែនមួយទៀត 50MP មានកម្រិតពង្រីក 5x ជា Telephoto ដូចគ្នាផងដែរ។ យ៉ាងណាទោះលែននេះ ថយប្រវែងតិចជាងមុនគុណនឹងពីរពិតមែន ប៉ុន្ដែលែន Telephoto 50MP នេះទំនងជានឹងផ្តល់នូវការបង្កើនគុណភាពរូបភាពឱ្យខ្លាំងផងដែរ។
យ៉ាងណា ចំពោះលក្ខណៈសម្បតិ្តពិតប្រាកដ និងរូបរាងយ៉ាងណា យើងនឹងរង់ចាំមើលទាំងអស់គ្នា នៅព្រឹត្តិការណ៍ Unpacked Event ពី Samsung ពេលមានដំណឹងជាក់លាក់ផ្ទាល់ពីក្រុមហ៊ុន៕