[ទីផ្សារបរទេស] ក្នុងសម័យកាលដែលកញ្ចប់លុយ ២ម៉ឺនដុល្លារ ពិបាកនឹងរកទិញរថយន្តមួយទឹកយកមកប្រើប្រាស់នោះ Nissan បែរជាប្រកាសលក់រថយន្តម៉ូដែល Versa ស៊េរីឆ្នាំ២០២៤ ក្នុងតម្លៃត្រឹមចាប់ពី ១៦ ១៣០ដុល្លារ ធ្វើឲ្យវាក្លាយជារថយន្តធូរថ្លៃជាងគេនៅអាមេរិក។
សម្រាប់ស៊េរីឆ្នាំ២០២៤នេះ មានការកើនឡើងតម្លៃ ១៥០ដុល្លារ ប៉ុណ្ណោះ ធៀបនឹងស៊េរីឆ្នាំ២០២៣ ហើយការផ្លាស់ប្ដូរគឺមានមិនច្រើនឡើយ ដោយការអាប់ដេតមានភាពខុសគ្នាបន្តិចបន្តួចរវាងប្រភេទ Versa S តម្លៃចាប់ពី ១៦ ១៣០ដុល្លារ, ប្រភេទ Versa SV តម្លៃចាប់ពី ១៩ ៤២០ដុល្លារ និងប្រភេទ Versa SR តម្លៃចាប់ពី ២០ ១៤០ដុល្លារ។
រថយន្ត Nissan Versa ស៊េរីឆ្នាំ២០២៤ ទាំងបីប្រភេទ មានបំពាក់នូវម៉ាស៊ីនដូចៗគ្នា ដែលជាម៉ាស៊ីន ១,៦លីត្រ ៤ស៊ីឡាំង អាចផលិតកម្លាំងបាន ១២២សេះ ដោយប្រភេទ Versa S តែមួយគត់ប្រើប្រអប់លេខដៃ៥វគ្គ ឯពីរប្រភេទទៀតប្រើប្រាស់ប្រអប់លេខអូតូ។
គួរដឹងថា Nissan Versa ស៊េរីឆ្នាំ២០២៤ អាចចាត់ទុកជាគូប្រជែងរបស់រថយន្ត Mitsubishi Mirage ឆ្នាំ២០២៤ ដែលមានតម្លៃប្រកៀកប្រកិតគ្នា ដោយរថយន្ត Mirage ស៊េរីថ្មី លើទីផ្សារអាមេរិកមានតម្លៃចាប់ពី ១៦ ៦៩៥ដុល្លារ៕
ប្រភព ៖ carscoops