[ទីផ្សារបរទេស] ក្រុមហ៊ុនរថយន្តអគ្គិសនីថ្មីថ្មោងរបស់អង់គ្លេសឈ្មោះថា Ark បានចាប់ផ្ដើមការដឹកជញ្ជូនរថយន្តម៉ូដែល Zero ដែលមានតម្លៃប្រមាណ ៧ ៣០០ដុល្លារ ជារថយន្តអគ្គិសនីដែលមានតម្លៃធូរថ្លៃជាងគេនៅប្រទេសអង់គ្លេស។
រថយន្ត Ark Zero បានដាក់លក់កាលពីខែមិថុនា ដោយអាចទិញបានតាមរយៈវិបសាយរបស់ក្រុមហ៊ុន Ark ដោយគិតមកទល់បច្ចុប្បន្នវាអាចលក់ចេញបានជាង ២០០គ្រឿងរួចមកហើយ។
មានទម្ងន់ ៤៨៩គីឡូក្រាម រថយន្តអគ្គិសនីដែលកៅអីអង្គុយពីរនេះ អាចបើកបរដល់លឿនបំផុត ៤៥គ.ម/ម៉ និងមានចម្ងាយបើកបរប្រមាណ ៨០គីឡូម៉ែត្រ ពេលសាកភ្លើងពេញ។
រថយន្តម៉ូដែល Zero នេះ មានប្រវែង ២៥០០ម.ម មានទទឹង ១២០២ម.ម និងមានកម្ពស់ ១៦២៥ម.ម ដែលធ្វើឲ្យវាមានប្រវែងខ្លីជាង ប៉ុន្តែខ្ពស់ជាងរថយន្ត Citroën Ami ដែលត្រូវបានចាត់ទុកថាជាគូប្រជែងដ៏សក្តិសមបំផុត។
រថយន្តនេះ ប្រើប្រាស់នូវដុំសាកស្តង់ដារ Type 1 ដែលអាចផ្ដល់កម្លាំងសាកបានដល់ ៧,៤kW ខណៈដែលការសាកភ្លើងចំណាយពេល ៦ ទៅ ៨ម៉ោង និងចំណាយប្រាក់មិនដល់ ១ផោន (ប្រមាណ ១,២២ដុល្លារ)។
បច្ចុប្បន្ននេះ រថយន្ត Zero មានលក់តែនៅអង់គ្លេសប៉ុណ្ណោះ ប៉ុន្តែក្រុមហ៊ុន Ark ក៏មានគម្រោងពង្រីកប្រតិបត្តិអាជីវកម្មរបស់ខ្លួននៅថ្ងៃអនាគត ព្រមទាំងគ្រោងប្រកាសចេញរថយន្តប្រភេទ A-segment ជាមួយនឹងសេវាកម្មរថយន្តតាក់ស៊ីស្វ័យប្រវត្តិដែលគ្រោងចាប់ផ្ដើមនៅទីក្រុងឡុងដ៏នាឆ្នាំក្រោយ៕
ប្រភព ៖ Autocar