ត្រឹមខែសីហា ចំនួនឡានចិននាំចេញទៅរុស្ស៊ី កើនឡើង ៦៦៤%

[ទីផ្សារបរទេស] ឧស្សាហកម្មយានយន្តចិនបាននាំចេញរថយន្តបាន ៤៣៦ ០០០គ្រឿង កាលពីខែសីហា ដែលជាការកើនឡើង ៣៩% ធៀបនឹងខែសីហា ឆ្នាំមុន ហើយគិតពីខែមករាដល់ខែសីហា ចំនួននាំចេញមានសរុបដល់ ៣,២២លានគ្រឿង ជាការកើនឡើង ៦៥%។

ពាណិជ្ជកម្ម

គួរចាប់អារម្មណ៍ដែរថា តម្លៃជាមធ្យមនៃរថយន្តដែលនាំចេញក្នុងរយៈពេល ៨ខែដំបូង នៃឆ្នាំ២០២៣នេះ បានកើនឡើងដល់ ២ម៉ឺនដុល្លារ ដោយធៀបនឹងកាលពីឆ្នាំ២០២២ គឺមានតម្លៃប្រមាណ ១៨ ០០០ដុល្លារ ប៉ុណ្ណោះ។

ជោគជ័យនៃការនាំចេញរថយន្តរបស់ចិន គឺដោយសារតែតម្រូវការដ៏ខ្លាំងក្លាក្នុងទីផ្សារដូចជាប្រទេសរុស្ស៊ី និងប្រទេសអាមេរិកឡាទីនមួយចំនួនក្នុងទ្វីបអាមេរិក។

ក្នុងឆ្នាំ២០២២ ចិនបាននាំចេញរថយន្ត ១៦ម៉ឺនគ្រឿង ទៅកាន់រុស្ស៊ី ហើយសម្រាប់ឆ្នាំ២០២៣ គិតត្រឹមខែសីហានេះ ចំនួននាំចេញបានឡើងដល់ ៥៤៤ ០០០គ្រឿង ជាការកើនឡើង ៦៦៤% ឯណោះ។

ទន្ទឹមនឹងនេះដែរ រថយន្តអគ្គិសនីរបស់ក្រុមហ៊ុនចិនក៏បានទាក់ទាញអតិថិជននៅលោកខាងលិចបានយ៉ាងច្រើនសន្ធឹកផងដែរ រួមទាំងទីផ្សារអាស៊ីអាគ្នេយ៍៕

ប្រភព ៖ carnewschina