[ទីផ្សារបរទេស] ក្រុមហ៊ុន Honda ទើបតែប្រកាសចេញម៉ូតូអគ្គិសនីខ្នាតតូចឈ្មោះថា Motocompacto រំពឹងថាដាក់លក់លើទីផ្សារបរទេសនៅខែវិច្ឆិកា ក្នុងតម្លៃប្រមាណ ៩៩៥ដុល្លារ។
ម៉ូតូ Motocompacto ដ៏ទាក់ទាញនេះ បានផលិតដោយយកលំនាំតាមម៉ូតូបត់បានដ៏ល្បីរបស់ Honda កាលពីជំនាន់ឆ្នាំ១៩៨០ ដែលមានឈ្មោះថា Honda Motocompo។
ម៉ូតូខ្នាតតូចនេះ អាចបើកបរបានចម្ងាយ ១៩គីឡូម៉ែត្រ ពេលសាកភ្លើងពេញ ហើយមានល្បឿនអតិបរមា ២៤គ.ម/ម៉ និងមានទម្ងន់ស្រាលត្រឹមតែ ១៨,៧គីឡូក្រាមប៉ុណ្ណោះ។ អាគុយទំហំ ៦,៨Ah នៃម៉ូតូនេះ អាចសាកភ្លើងពេញដោយចំណាយពេល ៣,៥ម៉ោង ពេលសាកជាមួយភ្លើងកម្លាំង ១១០វ៉ុល នៅអាមេរិក។
មុខងារពិសេសនៃម៉ូតូនេះគឺវាអាចបត់បានយ៉ាងតូចដែលងាយស្រួលយកតាមខ្លួន ដូចជាដាក់តាមរថយន្ត យកឡើងលើរថយន្តក្រុង ឬរថភ្លើងក្រុង និងជួយសន្សំទីតាំងចតផងដែរ។
Motocompacto មានប្រវែង ៩៧ស.ម ទទឹង ៤៤ស.ម និងកម្ពស់ ៨៩ស.ម ហើយពេលដែលបត់ វាមានប្រវែងតែ ៧៤ស.ម ទទឹង ៩ស.ម និងមានកម្ពស់ ៦២ស.ម ប៉ុណ្ណោះ៕
ប្រភព ៖ vnexpress