ឡាន Toyota Century SUV មានជម្រើសពណ៌ថ្នាំមួយ តម្លៃរហូតដល់ជាង ១ម៉ឺនដុល្លារ

[ទីផ្សារបរទេស] កាលពីថ្មីៗនេះ ក្រុមហ៊ុនរថយន្តជប៉ុន Toyota បានប្រកាសចេញជាផ្លូវការនូវរថយន្តប្រណីតថ្មីរបស់ខ្លួនជាម៉ូដែល Century SUV ដែលផលិតឡើងសម្រាប់ទីផ្សារជប៉ុនផ្ដាច់មុខតែម្ដង។

ពាណិជ្ជកម្ម

នៅថ្ងៃប្រកាសចេញ Toyota បានបញ្ជាក់ថាមិនមានផែនការលក់រថយន្តនេះទៅឲ្យអតិថិជនទូទៅឡើយ ដោយមានតែអតិថិជនដែលធ្លាប់ជាម្ចាស់រថយន្ត Century Sedan ទើបមានសិទ្ធិទិញរថយន្ត SUV ប្រណីតរបស់ខ្លួន។

នៅទីផ្សារប្រទេសជប៉ុន រថយន្ត Toyota Century SUV នឹងមានតម្លៃចាប់ពីប្រមាណ ១៧ម៉ឺនដុល្លារ ដែលតម្លៃរបស់វាអាចនឹងប្រែប្រួលអាស្រ័យលើការកុម្ម៉ង់របស់អតិថិជនម្នាក់ៗ។

ក្នុងនោះ អតិថិជនអាចកុម្ម៉ង់រថយន្តដែលមានពណ៌ទឹកថ្នាំខាងក្រៅតែមួយពណ៌ ដែល Option នេះមានតម្លៃប្រមាណ ១ពាន់ដុល្លារ។ ប្រសិនបើចង់បានពណ៌ចំនួនពីរលាយគ្នា តម្លៃនៃរថយន្តនឹងត្រូវកើនបន្ថែមប្រមាណ ៤ ៧៥០ដុល្លារ។

អ្វីដែលគួរឲ្យភ្ញាក់ផ្អើលនោះគឺ Option ដែលមានពណ៌ប្រផេះ លាយនឹងពណ៌ខ្មៅ នឹងធ្វើឲ្យតម្លៃរថយន្តកើនឡើងរហូតដល់ ២លានយេន ឬស្មើប្រមាណ ១៣ ៦០០ដុល្លារ ឯណោះ។
បន្ថែមពីហ្នឹង ប្រសិនបើអតិថិជនចង់តុបតែងបន្ថែម ដូចជាបន្ថែមកម្រាលជើង ត្រូវចាយប្រាក់បន្ថែម ២ ៧៦៦ដុល្លារ ហើយបើចង់បានពាក្យ “Century” រំលេចនៅផ្នែកខាងក្រោយនៃទ្វារចូល ត្រូវបន្ថែមប្រាក់ ៥ ២៣២ដុល្លារ ឯណោះ៕

ប្រភព ៖ Xehay