[ទីផ្សារបរទេស] ក្រុមហ៊ុន Toyota ផលិតបានរថយន្ត Hilux ប្រភេទប្រើឧស្ម័នអ៊ីដ្រូហ្សែន ជាប្រភេទផលិតគំរូ ដែលបានបង្ហាញវត្តមាននៅឯរោងចក្រ Burnaston ក្នុងប្រទេសអង់គ្លេស។
រថយន្តនេះគឺជាគម្រោងការផលិតជាមួយដៃគូ និងគាំទ្រដោយរដ្ឋាភិបាលអង់គ្លេស ដោយ Toyota គ្រោងផលិតរថយន្តនេះឲ្យបានចំនួន១០គ្រឿង នៅត្រឹមចុងឆ្នាំ២០២៣នេះ។
រថយន្ត Hilux Hydrogen Fuel Cell នេះបានប្រើប្រាស់គ្រឿងមួយចំនួនមកពីរថយន្ត Toyota Mirai ហើយ Toyota បានប៉ាន់ស្មានថាវាមានចម្ងាយបើកបរ ៥៨៧គ.ម ពេលចាក់អ៊ីដ្រូហ្សែនពេញ។
ជាការប្រៀបធៀប រថយន្ត Hilux លក់លើទីផ្សារប្រទេសអូស្ត្រាលីដែលប្រើម៉ាស៊ីនម៉ាស៊ូត ២,៨លីត្រ អាចបើកបរបានចម្ងាយប្រមាណ ១១៥០គ.ម។
Toyota បានចាប់ផ្ដើមគម្រោងការនៅដើមឆ្នាំ២០២២ ជាការសិក្សាមួយ ដែលក្រោយមកការឌីហ្សាញ និងការអភិវឌ្ឍបានចាប់ផ្ដើមនៅថ្ងៃទី១ ខែកក្កដា ឆ្នាំ២០២២។ នៅថ្ងៃទី៥ ខែមិថុនា ឆ្នាំ២០២៣ ការផលិតក៏បានចាប់ផ្ដើម។
Toyota គ្រោងយករថយន្ត១០គ្រឿងដែលផលិតបាន យកទៅធ្វើតេស្តដើម្បីធានាថាវាមានភាពរឹងមាំ និងខ្លាំងក្លាដូចជាកិត្តនាមរបស់រថយន្ត Hilux នាពេលកន្លងមក។ យ៉ាងណា មកទល់ពេលនេះគេនៅមិនច្បាស់ថារថយន្ត Hilux ប្រភេទប្រើឧស្ម័នអ៊ីដ្រូហ្សែន នឹងលេចវត្តមានលើទីផ្សារឬយ៉ាងណានោះទេ៕
ប្រភព ៖ Inside EVs