ពាណិជ្ជកម្មរវាងរុស្សី និងចិនកាន់តែមានភាពស្និទ្ធស្នាលជាងមុន ដោយ ៧២ ភាគរយនៃការនាំចូលនៅក្នុងខែមេសាគឺទាក់ទងនឹងថាមពល។
យោងតាមទិន្នន័យពីគយចិនបានបង្ហាញថា ក្នុងខែមេសាប្រទេសចិនបានបន្តបង្កើនការទិញថាមពលពីរុស្ស៊ី ជាមួយនឹងចំណូលនៃប្រេងឆៅ ឧស្ម័ន និងធ្យូងថ្មកើនឡើងដល់ ៧៥% មានតម្លៃស្មើ ៦,៤២ពាន់លានដុល្លារ។ តួលេខនេះបានកើនឡើងបើទោះបីជាតម្រូវការក្នុងស្រុកមានការថយចុះដោយសារជំងឺរាតត្បាត ហើយសហរដ្ឋអាមេរិក និងអឺរ៉ុបកាត់បន្ថយការទិញពីរុស្ស៊ី។
ការនាំចូលឧស្ម័នធម្មជាតិរាវ (LNG) ពីប្រទេសរុស្ស៊ីបានកើនឡើង ៨០ភាគរយធៀបនឹងរយៈពេលដូចគ្នាកាលពីឆ្នាំមុន ស្មើ ៤៦៣ ០០០ តោន។ ទន្ទឹមនឹងនេះ ការនាំចូលឧស្ម័នរាវសរុបរបស់ប្រទេសចិនបានធ្លាក់ចុះជាងមុន ១/៣ ដោយសារការបិទ និងការរឹតបន្តឹងលើសកម្មភាពឧស្សាហកម្មបានធ្វើឱ្យតម្រូវការធ្លាក់ចុះ។
ការនាំចូលប្រេងឆៅបានកើនឡើង ៤%ពីមួយឆ្នាំទៅមួយឆ្នាំដល់ ៦,៥៥លានតោន។ រុស្ស៊ីជាប្រទេសទីពីរបន្ទាប់ពីអារ៉ាប៊ីសាអូឌីតជាអ្នកផ្គត់ផ្គង់ប្រេងដល់ប្រទេសចិន។
ការកើនឡើងតម្លៃបន្ទាប់ពីយុទ្ធនាការយោធារបស់រុស្ស៊ីនៅអ៊ុយក្រែនបណ្តាលឱ្យការនាំចូលឥន្ធនៈហ្វូស៊ីលរបស់ចិនកើនឡើង។ នេះមានន័យថា ៧២%នៃការនាំចូលរបស់ចិនពីរុស្ស៊ីក្នុងខែមេសាគឺទាក់ទងនឹងថាមពល។
ទោះជាយ៉ាងណាក៏ដោយ ចំណូលនៃការនាំចូលឧស្ម័នមិនរាប់បញ្ចូលបំពង់បង្ហូរប្រេងទេ។ ចំនួននេះមិនត្រូវបានគេរាយការណ៍ទេចាប់តាំងពីដើមឆ្នាំនេះ ខណៈបំពង់ Power of Siberia ក៏ជាបណ្តាញនាំចូលឥន្ធនៈដ៏សំខាន់សម្រាប់ប្រទេសចិនផងដែរ។
លើសពីនេះ ទីក្រុងប៉េកាំងកំពុងចរចាជាមួយទីក្រុងមូស្គូ លើការបំពេញឡើងវិញនូវទុនបម្រុងប្រេងយុទ្ធសាស្ត្ររបស់ខ្លួនជាមួយនឹងប្រេងថោករបស់រុស្ស៊ី។ នេះជាសញ្ញាមួយបង្ហាញថាទំនាក់ទំនងថាមពលរវាងប្រទេសទាំងពីរកាន់តែរឹងមាំឡើងក្នុងបរិបទជម្លោះរវាងរុស្ស៊ីនិងលោកខាងលិច ដោយសារសង្គ្រាមនៅអ៊ុយក្រែន៕