តម្លៃប្រេងឡើងខ្ពស់ ត្រូវបានកំណត់នាំឲ្យតម្លៃសំបុត្រយន្តហោះកើនឡើង ១០% នេះបើយោងតាមប្រធាននៃក្រុមហ៊ុនអាកាសចរណ៍ធំបំផុតមួយរបស់ពិភពលោក។
ប្រធានក្រុមហ៊ុនអាកាសចរណ៍ Delta Air Lines លោក Ed Bastian បានប្រាប់ទៅកាន់សារព័ត៌មាន BBC ពីផលប៉ះពាល់ចុងក្រោយ ដែល “ពិតជាអាស្រ័យលើតម្លៃប្រេងឥន្ធនៈ” ។
គួរឲ្យដឹងថា តម្លៃប្រេងបានឡើងដល់កម្រិតខ្ពស់បំផុត ក្នុងរយៈពេល ១៤ ឆ្នាំ បន្ទាប់ពីការឈ្លានពានរបស់រុស្ស៊ីទៅលើអ៊ុយក្រែន។
ជាមួយគ្នានេះដែរ ក្រុមហ៊ុន Emirates, Japan Airlines និង AirAsia ស្ថិតក្នុងចំណោមក្រុមហ៊ុនអាកាសចរណ៍ធំៗ ដែលណែនាំតម្លៃបន្ថែមលើសំបុត្ររបស់ពួកគេ នាពេលថ្មីៗនេះ ដើម្បីរ៉ាប់រងថ្លៃដើមខ្ពស់នៃប្រេងឥន្ធនៈ។
សូមបញ្ជាក់ផងដែរថា មុនពេលជំងឺរាតត្បាតនៅឆ្នាំ ២០១៩ អតិថិជន ២០០ លាននាក់ បានហោះហើរនៅលើ Delta ដែលធ្វើឲ្យវាក្លាយជាក្រុមហ៊ុនអាកាសចរណ៍ធំបំផុតទី២ របស់ពិភពលោក បើគិតតាមចំនួនអ្នកដំណើរ៕