យោងតាមសមាគមអ្នកនាំចេញ និងផលិតអាហារសមុទ្រវៀតណាម (VASEP) បានឲ្យដឹងថា ការនាំចេញអាហារសមុទ្ររបស់វៀតណាម បានកើនឡើង ៥១ ភាគរយ ពីមួយឆ្នាំទៅមួយឆ្នាំ ក្នុងខែមករា ដល់ ខែកុម្ភៈ សរុបដល់ ១,៥ ពាន់លានដុល្លារ។
ក្នុងនោះការនាំចេញត្រីឆ្លាំង និងត្រីធូណា នាំមុខដោយកំណើន ៩៣ ភាគរយ និង ៨៣ ភាគរយ ដោយប្រកាសចំណូលសរុប ៣៨៤ លានដុល្លារ និង ១៥៦ លានដុល្លារ រៀងខ្លួន។ ជាមួយគ្នានេះដែរ ការនាំចេញបង្គា មឹក និង ត្រីយាវហឺ ក៏បានកើនឡើង ៤៥ ភាគរយ ផងដែរ។
គួរឲ្យដឹងថា ទីផ្សារធំបំផុតទាំង ៥ សម្រាប់អាហារសមុទ្រវៀតណាម មាន ១១ ប្រទេសនៃដៃគូអន្តរប៉ាស៊ីហ្វិក (CPTPP), សហរដ្ឋអាមេរិក, អឺរ៉ុប, ចិន និង កូរ៉េខាងត្បូង។
មិនតែប៉ុណ្ណោះ នៅក្នុងខែកុម្ភៈតែឯង ការនាំចេញបានកើនឡើង ៦២ ភាគរយ ពីមួយឆ្នាំទៅមួយឆ្នាំ បន្ទាប់ពីបានកើនឡើង ៤៤ ភាគរយ នៅក្នុងខែមករា។
យ៉ាងណាមិញ VASEP រំពឹងថា ការនាំចេញនឹងបន្តកើនឡើងចំពេលមានការកើនឡើងនៃតម្រូវការអាហារសមុទ្រលើពិភពលោក។ ទោះជាយ៉ាងណា អ្នកនាំចេញគ្រឿងសមុទ្រមួយចំនួនត្រូវរងគ្រោះដោយសារជម្លោះរុស្ស៊ី និងអ៊ុយក្រែន។ វៀតណាម ជាប្រទេសនាំចូលត្រីធំបំផុតទី៣ របស់រុស្ស៊ី កាលពីឆ្នាំមុន បន្ទាប់ពីប្រទេសអាហ្សង់ទីន និងចិន៕