វៀតណាម នឹងកំណត់ការនាំចេញធ្យូងថ្មរបស់ខ្លួនចំនួនត្រឹម ២,០៣ លានតោននៅឆ្នាំ ២០២២ នេះ។ នេះបើយោងតាមក្រសួងឧស្សាហកម្ម និងពាណិជ្ជកម្មរបស់ប្រទេសវៀតណាម។
តួលេខខាងលើតំណាងឲ្យការកើនឡើង ២២,៥ ភាគរយពី ១,៥៥ លានតោន កាលពីឆ្នាំមុន។ ប៉ុន្តែវៀតណាមក៏បាននាំចូលធ្យូងថ្មច្រើនដែរ ហើយការនាំចេញសុទ្ធរបស់វាមានចំនួន ៥០ ០០០ តោន។
ក្រសួងខាងលើបានបន្ថែមទៀតថា ជាដំបូងអ្នកនាំចេញធ្យូងថ្មត្រូវតែធានាថា មានការផ្គត់ផ្គង់គ្រប់គ្រាន់សម្រាប់ការប្រើប្រាស់ក្នុងស្រុក។ ក្នុងនោះមានក្រុមហ៊ុននាំចេញធ្យូងថ្មវៀតណាម ចំនួន២ គឺ Vietnam National Coal and Mineral Industries Group និង Dong Bac Corporation ដែលជាកម្មសិទ្ធិរបស់រដ្ឋ។
គួរឲ្យដឹងថា នៅលើទីផ្សារពិភពលោក តម្លៃធ្យូងថ្មបានឡើងដល់កម្រិតខ្ពស់បំផុតក្នុងរយៈពេល ១៤ ឆ្នាំគឺ ៤០១ដុល្លារ ក្នុងមួយតោន កាលពីថ្ងៃពុធ ដែលជំរុញដោយឥទ្ធិពលនៃជម្លោះរុស្ស៊ី និងអ៊ុយក្រែន លើការផ្គត់ផ្គង់៕