របាយការណ៍មួយបានអះអាងថា ក្រុម Hacker កូរ៉េខាងជើង បានលួចទ្រព្យសម្បត្តិឌីជីថលដែលមានតម្លៃជិត ៤០០ លានដុល្លារ នៅក្នុងការវាយប្រហារយ៉ាងហោចណាស់ ៧លើក លើវេទិការូបិយប័ណ្ណគ្រីបតូកាលពីឆ្នាំមុន។
ក្រុមហ៊ុនវិភាគ Blockchain មួយមានឈ្មោះថា Chainalysis បាននិយាយថា វាជាឆ្នាំជោគជ័យបំផុតមួយនៅលើកំណត់ត្រាសម្រាប់ឧក្រិដ្ឋជនតាមអ៊ីនធឺណិត នៅក្នុងរដ្ឋអាស៊ីខាងកើតនោះ។ ការវាយប្រហារនេះផ្តោតជាសំខាន់ទៅលើក្រុមហ៊ុនវិនិយោគ និងឈ្មួញកណ្តាល។
គួរឲ្យដឹងដែរថា កូរ៉េខាងជើង តែងតែបដិសេធថាមិនបានជាប់ពាក់ព័ន្ធនឹងការវាយប្រហារណាមួយឡើយ។
Chainalysis បាននិយាយនៅក្នុងរបាយការណ៍មួយថា “ចាប់ពីឆ្នាំ ២០២០ ដល់ឆ្នាំ ២០២១ ចំនួននៃការលួចចូលរបស់កូរ៉េខាងជើង បានកើនឡើងពី ៤ ទៅ ៧ លើក ហើយតម្លៃដែលស្រង់ចេញពីការលួចចូលទាំងនេះបានកើនឡើង ៤០% ឯណោះ”។
ក្រុមហ៊ុនខាងលើបានបន្ថែមទៀតថា ពួក Hacker បានប្រើបច្ចេកទេសមួយចំនួន រួមទាំងការបោកបញ្ឆោត ការកេងប្រវ័ញ្ចកូដ និងមេរោគ ដើម្បីឆក់យកប្រាក់ពីកាបូប “hot wallets” ហើយបន្ទាប់មកបានផ្លាស់ប្តូរពួកវាទៅក្នុងអាសយដ្ឋានដែលគ្រប់គ្រងដោយកូរ៉េខាងជើង៕