ដោយសារកង្វះខាតដំឡូង ក្រុមហ៊ុនអាហារផលិតរហ័សត្រូវជួលយន្តហោះចំនួន ៣គ្រឿង ដែលពេញដោយដំបូងទៅប្រទេសជប៉ុន។ កង្វះខាតដំឡូងបានបង្ខំឱ្យខ្សែសង្វាក់ផលិតអាហាររហ័ស បានកំណត់លើការលក់ដំឡូងបំពងក្នុងប្រទេសជប៉ុន។ លោក Ryan Petersen នាយកប្រតិបត្តិក្រុមហ៊ុនអាកាសចរណ៍អាមេរិក Flexport បាននិយាយថា “ក្រុមហ៊ុន Flexport ទើបតែបានចុះហត្ថលេខាលើកិច្ចសន្យាហោះហើរយន្តហោះ Boeing 747 ចំនួន ៣គ្រឿងដែលដឹកដំឡូងទៅប្រទេសជប៉ុន ដើម្បីជួយដោះស្រាយកង្វះខាតដំឡូងបារាំង” ។
ចាប់ពីថ្ងៃទី ២១ ខែធ្នូ ក្រុមហ៊ុន McDonald’s Japan បានប្រកាសថា ខ្លួននឹងលក់តែដំឡូងបំពងតូចៗប៉ុណ្ណោះ បន្ទាប់ពីទឹកជំនន់នៅកំពង់ផែ Vancouver ហើយជំងឺរាតត្បាតបានប៉ះពាល់យ៉ាងខ្លាំងដល់ការផ្គត់ផ្គង់របស់របរនេះ។ យោងតាមរបាយការណ៍របស់ទូរទស្សន៍ជប៉ុន អ្នកទទួលទានអាហារត្រូវរង់ចាំជាជួរយ៉ាងយូរនៅឯហាង McDonald’s ក្នុងទីក្រុងតូក្យូ ដើម្បីទិញដំឡូងបំពងមួយភាគធំ មុនពេលការរឹតបន្តឹងថ្មីរបស់ក្រុមហ៊ុនចូលជាធរមាន។
McDonald’s សង្ឃឹមថា បញ្ហានេះនឹងត្រូវបានដោះស្រាយត្រឹមឆ្នាំថ្មី។ ក្រុមហ៊ុននេះកំពុងរៀបចំជម្រើសនៃការដឹកជញ្ជូនដំឡូងតាមយន្តហោះជំនួសឱ្យសមុទ្រ។ អ្នកនាំពាក្យរបស់ក្រុមហ៊ុននេះនៅក្នុងប្រទេសជប៉ុនបាននិយាយថា ខ្លួននឹងបន្តលក់កញ្ចប់ដំឡូងខ្នាតមធ្យម និងធំឡើងវិញនៅក្នុងប្រទេសជប៉ុនចាប់ពីថ្ងៃទី ៣១ ខែធ្នូ។
ភាពខ្វះខាតនៃវត្ថុធាតុដើមមិនត្រូវបានកំណត់ចំពោះប្រទេសជប៉ុនទេ។ នៅទីក្រុងញូវយ៉ក (សហរដ្ឋអាមេរិក) ហាងសាំងវិច JG Melon ក៏បានប្រកាសកាលពីសប្តាហ៍មុនថា ខ្លួននឹងឈប់លក់ដំឡូងបំពង ដោយសារតែបញ្ហាខ្សែសង្វាក់ផ្គត់ផ្គង់ ការផ្គត់ផ្គង់អាហារផ្សេងៗ ដូចជាមាន់ក៏មានការលំបាកដូចគ្នាដែរ៕