ក្រុមហ៊ុន Big C Supercenter Plc គ្រោងនឹងបង្កើនការវិនិយោគ ដើម្បីពង្រីកអាជីវកម្មលក់រាយរបស់ខ្លួននៅកម្ពុជា ក្នុងរយៈពេល ៥ ឆ្នាំខាងមុខនេះ។
លោក Gary Hardy ប្រធានផ្នែកប្រតិបត្តិការក្រុមហ៊ុនខាងលើ បានមានប្រសាសន៍ថា “ជាមួយនឹងផែនការ ៥ ឆ្នាំរបស់យើង គឺយើងមានបំណងក្លាយជាអ្នកលក់រាយលេខ ១ នៅកម្ពុជា ទាក់ទងនឹងតម្លៃ ទំហំ និងការយល់ឃើញក្នុងចំណោមអតិថិជនកម្ពុជា”។
លោក Hardy បានឲ្យដឹងទៀតថា ក្រុមហ៊ុនគ្រោងនឹងបើកហាង Big C រាប់រយកន្លែងនៅក្នុងទំហំ និងទម្រង់ខុសៗគ្នា នៅក្នុងទីក្រុងភ្នំពេញ និងទីក្រុងធំៗផ្សេងទៀត ដូចជា សៀមរាប និងបាត់ដំបង ជាដើម។
គួរឲ្យដឹងថា ទម្រង់ហាងទាំងនោះរួមមាន hypermarket, supermarkets និង Mini Big C ផងដែរ។
ខណៈពេលដែលតួលេខវិនិយោគពិតប្រាកដមិនត្រូវបានបង្ហាញនោះ លោក Hardy បានបន្ថែមថា ការពង្រីកនេះនឹងមានតាមរយៈហាងដែលខ្លួនជាម្ចាស់ ទោះបីជាសក្តានុពលនៃគំរូយីហោហ្វ្រេនឆាយ អាចត្រូវបានធ្វើឡើងនាពេលអនាគតក៏ដោយ។
សូមបញ្ជាក់ឲ្យដឹងដែរថា ក្រុមហ៊ុន Big C Supercenter Plc បានពង្រីកអាជីវកម្មលក់រាយរបស់ខ្លួននៅក្នុងប្រទេសកម្ពុជា ដោយបើកផ្សារទំនើប Big C ដំបូងបង្អស់នៅទីក្រុងប៉ោយប៉ែត កាលពីប៉ុន្មានឆ្នាំមុន។ មិនតែប៉ុណ្ណោះ ថ្មីៗនេះ Big C បានបើកហាង Mini Big C ដំបូងរបស់ខ្លួននៅម្តុំផ្សារដេប៉ូ ក្នុងរាជធានីភ្នំពេញ ទៀតផង៕