ក្រុមហ៊ុនបច្ចេកវិទ្យាយក្សរុស្ស៊ី Yandex នឹងដាក់ដំណើរការសាកល្បងតាក់ស៊ីកបើកបរដោយខ្លួនឯង នៅក្នុងទីក្រុងម៉ូស្គូ នៅឆ្នាំ ២០២១ នេះតែម្តង។
ក្រុមហ៊ុន Yandex ដែលប្រតិបត្តិការសេវាកម្មជាច្រើន ចាប់តាំងពី online search រហូតដល់ ការដឹកជញ្ជូនអាហារនោះ បាននិងកំពុងសាកល្បងបច្ចេកវិទ្យាបើកបរដោយខ្លួនឯង អស់រយៈពេលជាង ៣ឆ្នាំមកហើយ នៅប្រទេសរុស្ស៊ី អ៊ីស្រាអែល និងសហរដ្ឋអាមេរិក។
Yandex បាននិយាយនៅក្នុងសេចក្តីថ្លែងការណ៍មួយថា តាក់ស៊ីបើកបរដោយខ្លួនឯង Robotaxisនឹងមានតាមរយៈកម្មវិធី Yandex.Go របស់ក្រុមហ៊ុន នៅក្នុងស្រុកមួយ នៃទីក្រុងម៉ូស្គូ សម្រាប់អតិថិជនជាក់លាក់មួយចំនួន។
ក្រុមហ៊ុនបាននិយាយថា “ការបើកដំណើរការនៅស្រុក Yasenevo គឺជាដំណាក់កាលដំបូងនៃគម្រោង Yandex ដ៏ធំ ដើម្បីបើកដំណើរការតាក់ស៊ីគ្មានមនុស្សបើក។ យូរទៅ នឹងមានរថយន្ត ចំនួនទីតាំងដែលអ្នកអាចទៅ និងទៅបាន កាន់តែច្រើន ហើយមនុស្សកាន់តែច្រើននឹងអាចជិះតាក់ស៊ីគ្មានអ្នកបើកបរនេះបាន”។
ទោះបីជាយ៉ាងណាក៏ដោយ ច្បាប់រុស្ស៊ីមិនទាន់អនុញ្ញាតឲ្យយានយន្តគ្មានអ្នកបើកបរធ្វើដំណើរដោយគ្មានមនុស្សអង្គុយនៅកន្លែងដៃចង្កូតនៅឡើយទេ លើកលែងតែនៅក្នុងតំបន់សេដ្ឋកិច្ចពិសេស ដូចជា ទីក្រុង Innopolis ក្នុងតំបន់ Tatarstan៕