Aston Martin បានរីករាយនឹងត្រីមាសទី១ ឆ្នាំ២០២១ ដែលប្រកបដោយផ្លែផ្កា ហើយមូលហេតុចម្បងគឺដោយសារតែប្រជាប្រិយភាពរបស់ម៉ូដែល DBX ដែលជា SUV ដំបូងបង្អស់របស់ខ្លួន។
ក្នុងអំឡុងពេល ៣ ខែដំបូងនៃឆ្នាំនេះ ក្រុមហ៊ុន Aston Martin បានចែកចាយរថយន្តចំនួន ១ ៣៥៣ គ្រឿង ដែលច្រើនជាងទ្វេដង ក្នុងរយៈពេលដូចគ្នាកាលពីឆ្នាំមុន ដោយម៉ូដែល DBX មានចំនួន ៥៥ ភាគរយនៃការលក់សរុប។ នៅពីក្រោយនៃតួលេខលក់ទាំងនេះ ប្រាក់ចំណូលសម្រាប់ក្រុមហ៊ុនផលិតរថយន្តរបស់អង់គ្លេសខាងលើ បានកើនឡើង ១៥៣ ភាគរយពីមួយឆ្នាំទៅមួយឆ្នាំ។
នាយកប្រតិបត្តិក្រុមហ៊ុន Aston Martin លោក Tobias Moers មានប្រសាសន៍ថា “ខ្ញុំរីករាយជាមួយនឹងដំណើរការរបស់យើង ក្នុងរយៈពេល ៣ ខែដំបូងនៃឆ្នាំនេះ ដែលផ្តល់លទ្ធផលស្របតាមការរំពឹងទុករបស់យើង អំពីកំណើនល្អ និងវឌ្ឍនភាពនៅលើមាគ៌ាឆ្ពោះទៅរកភាពប្រសើរឡើងនៃប្រាក់ចំណេញ និងការបង្កើតសាច់ប្រាក់”។
គួរឲ្យដឹងដែរថា រថយន្ត Aston Martin DBX បានចាប់ផ្តើមផលិត នៅខែមិថុនា ឆ្នាំ ២០២០ ហើយក្រុមហ៊ុនជឿជាក់ថា ខ្លួនអាចលក់វាបានចំនួន ៦ ០០០ គ្រឿងនៅឆ្នាំនេះ៕