បងប្អូនអាចនឹងស្គាល់ ឬធ្លាប់ឮពីឱសថគីណាល់ ជាថ្នាំបំបាត់ការឈឺចាប់ដ៏ល្បីល្បាញមួយ ដែលបានបម្រើសុខភាពប្រជាជនខ្មែរអស់រយៈពេលជាច្រើនទសវត្សរ៍ តាំងពីឆ្នាំ ១៩៦០ មកម្ល៉េះ។ ឱសថនេះត្រូវបានផលិតឡើងដោយលោកឱសថបណ្ឌិត កុក សុខគីម ត្រូវជាឪពុកក្មេករបស់លោកឧកញ៉់ាឱសថបណ្ឌិត ហៃ លីអ៊ាង សព្វថ្ងៃជាអគ្គនាយកក្រុមហ៊ុន ប៉េប៉េអឹម – PPM។
ចំណែក ប៉េប៉េអឹម – PPM ត្រូវបានបង្កើតឡើងដោយ លោកឧកញ៉់ាឱសថបណ្ឌិត ហៃលីអ៊ាង ក្នុងឆ្នាំ ១៩៩៦ ដែលជាសហគ្រាសផលិតឱសថដំបូងគេនៅកម្ពុជា។ មានសមត្ថភាពផលិតឱសថបានជាង ២០០មុខ សម្រាប់ផ្គង់ផ្គង់នៅក្នុងស្រុក រួមទាំងចែកចាយទៅតាមបណ្តាប្រទេសមួយចំនួននៅតំបន់អាហ្វ្រិក តំបន់អាសុីអាគ្នេយ៍ និងអឺរ៉ុប។ រីឯម៉ាកសញ្ញា គុណភាពផលិតផលត្រូវបានទទួលស្គាល់ដោយអន្តរជាតិយ៉ាងត្រឹមត្រូវ។
បច្ចុប្បន្ន ឱសថជាច្រើនប្រភេទត្រូវបានផលិតឡើងរួមមាន ថ្នាំផ្សះ, ថ្នាំបំបាត់ការឈឺចាប់ , ថ្នាំប្រឆាំងនឹងការរលាក, វីតាមីន និងផលិតផលថែទាំសុខភាពទូទៅ។ ជាពិសេសនោះក្រុមហ៊ុន ប៉េប៉េអឹម – PPM បានសហការជាមួយនឹង ឱសថការីខ្មែរ ក្នុងការផលិត ឱសថគីណាល់ចេញជា ៧ ប្រភេទបន្ថែមទៀត រួមទាំងឱសថផ្សេងៗ ដែលមានប្រសិទ្ធភាព ព្យាបាលទៅតាមអាការៈខុសៗគ្នា។
ក្រៅពីនេះ ក្រុមហ៊ុនក៏បានចូលរួមយ៉ាងសកម្មក្នុងស្រាវជ្រាវផលិតផល ឆ្លើយតបទៅនឹងជំងឺកើតឡើងផ្សេងៗ ដើម្បីឈានដល់ការបង្កើត និងផលិតឱសថសម្រាប់ប្រជាជនកម្ពុជា ជាចំណែកក្នុងការចូលរួមអភិវឌ្ឍវិស័យសុខាភិបាល និងប្រទេសជាតិទាំងមូល។