Samsung ត្រូវបានស្គាល់ជា ក្រុមហ៊ុនបច្ចេកវិទ្យាធំមួយប្រចាំពិភពលោក ដែលមានលោក Lee Byung Chul ជាស្ថាបនិក បង្កើតឡើងតាំងពីឆ្នាំ ១៩៣៨ មកម្ល៉េះ។ ផ្តើមចេញពីក្រុមហ៊ុនផ្គត់ផ្គង់អាហារស្ងួត គ្រឿងទេស ជាមួយនឹងដើមទុនដំបូង ៣០.០០០ វ៉ុន ប្រមាណ $២៧។
ឈ្មោះ Samsung ត្រូវបានជ្រើសរើសផ្ទាល់ដោយលោក Lee ជាភាសាកូរ៉េមានន័យថា ផ្កាយបី តំណាងឲ្យអ្វីមួយដែលមានថាមពល។ នៅឆ្នាំ ១៩៥៤ លោកបានពង្រីកអាជីវកម្មបន្ថែម ដោយបានបង្កើតរោងច្រផលិតស្ករនៅតំបន់ប៊ូសាន រួមទាំងបង្កើតបានរោងចក្រផលិតរោមចៀមផងដែរ។
នៅឆ្នាំ ១៩៦៩ ក្រុមហ៊ុន Samsung ចាប់ផ្តើមប្រឡូកចូលវិស័យអេឡិចត្រូនិក ដោយមានរោងចក្រនៅទីក្រុង Suwon។ ទូរទស្សន៍ សខ្មៅ គឺជាទំនិញដែលបានផលិតដំបូងគេ ផលិតបានដល់ទៅ ៥ លានគ្រឿងក្នុងឆ្នាំ ១៩៧៨។ បន្ទាប់មកផលិតជាទូរទឹកកក តុអគ្គិសនី ម៉ាសុីនត្រជាក់ ដែលភាគច្រើនសុទ្ធតែជាសម្ភារប្រើប្រាស់ក្នុងផ្ទះ។ គ្រឿងអេឡិចត្រូនិកទាំងអស់នេះ ក៏ត្រូវបាននាំចេញទៅប្រទេសអាល្លឺម៉ង ព័រទុយហ្គាល់ ជប៉ុន។
នៅឆ្នាំ ១៩៨០ Samsung ក៏បានចូលរួមក្នុងវិស័យទូរគមនាគមន៍ ដោយបានចំណាយប្រាក់ជាច្រើនក្នុងការទិញយកក្រុមហ៊ុន Hanguk Jeonja Tongsin រួចបង្កើតជាក្តារចុចទូរស័ព្ទ ផលិតជាឧបករណ៍ទំនាក់ទំនង និងក្រោយមកក៏ផលិតបានជាទូរស័ព្ទ ម៉ូដែល SH-100 គឺជាទូរស័ព្ទដំបូងគេរបស់ Samsung។ ៧ឆ្នាំក្រោយមក នៅឆ្នាំ ១៩៨៧ បន្ទាប់ពីលោក Lee Byung-chul ទទួលមរណៈភាព ក្រុមហ៊ុនត្រូវបានបន្តគ្រប់គ្រងដោយលោក Lee Kun-hee ជាកូនប្រុស។
ចាប់ពីពេលនោះមក Samsung ត្រូវបានបែងចែកជា ៤ ក្រុមហ៊ុនដូចជា Samsung Group, Shinsegae Group, CJ Group និង Hansol Group។ ដោយឡែក Samsung Group នៅតែផ្តោតទាំងស្រុងទៅលើខាងបច្ចេកវិទ្យា ចែកជា ៣ ផ្នែកសំខាន់ៗគឺ ឧបករណ៍ប្រើប្រាស់ក្នុងផ្ទះ ទូរគមនាគមន៍ និងប្រភេទគ្រឿងអេឡិចត្រូនិក។
គិតមកដល់ពេលនេះ Samsung ដំណើរការបាន ៨៧ឆ្នាំ នៅក្នុងវិស័យបច្ចេកវិទ្យាជាប់ចំណាត់ថ្នាក់លេខ ២ ជាក្រុមហ៊ុនឈានមុខគេក្នុងទីផ្សារសកល។ ចាប់ផ្តើមចេញពីក្រុមហ៊ុនជួយដូរធម្មតាមួយ តែក្រឡេកមកមើលឥឡូវនេះ ជាក្រុមហ៊ុនមានបុត្រសម្ព័ន្ធជាច្រើនក្នុងដៃ ជាមួយនឹងរោងចក្រផលិតនៅតាមបណ្តាប្រទេសនានា ដែលគេសន្មត់ថាតម្លៃរបស់ក្រុមហ៊ុន Samsung គឺដល់ទៅ ៣១៨.៨ ពាន់លានដុល្លារ គិតត្រឹមខែកក្កដា ឆ្នាំ២០២៥នេះ។