មិនគួរឲ្យជឿ! ក្រុមហ៊ុនភេសជ្ជៈលំដាប់ពិភពលោកមួយនេះធ្លាប់ក្ស័យធន់ដល់ទៅ ២លើក

Pepsi ត្រូវបានបង្កើតដោយលោក Caleb Bradham ដែលជាឱសថការីក្នុងឆ្នាំ ១៨៩៣។ ដោយចាប់ផ្តើមដាក់លក់ដំបូងនៅឱសថស្ថានលោក Bradham នៅទីក្រុង New Bern រដ្ឋ North Carolina សហរដ្ឋអាមេរិកដែលជាកន្លែងផលិតនិងពិសោធន៍ផ្ទាល់។ 

ពាណិជ្ជកម្ម

ភេសជ្ជៈនេះមានឈ្មោះដំបូងថា Brad’s Drink ប៉ុន្តែត្រូវបានដូរឈ្មោះ ជាច្រើនទម្រាំក្លាយជាឈ្មោះ Pepsi ដូចសព្វថ្ងៃនេះ។ នៅឆ្នាំដំបូង Pepsi លក់បានដល់ទៅជាង ៣០,០០០លីត្រ ធ្វើឲ្យឈ្មោះភេសជ្ជៈនេះមានភាពល្បីល្បាញរហូតដល់មានសារព័ត៌មានចុះផ្សាយថែមទៀត។​ ក្នុងឆ្នាំ ១៩១០ ក្រុមហ៊ុនមានដៃគូចែកចាយដល់ទៅ​ ២៤រដ្ឋ ធ្វើឲ្យចំនួនផលិតកើនឡើងដល់ទៅ ១០មុឺនលីត្របន្ថែមទៀត។ម៉ាកយីហោភេសជ្ជៈល្បីឈ្មោះមួយ ប៉ុន្តែធ្លាប់ប្រកាសលក់ទៅឲ្យក្រុមហ៊ុន កូកាកូឡា នៅក្នុងឆ្នាំ ១៩២២ តែមិនបានជោគជ័យនោះទេ នេះបើតាមការចុះផ្សាយរបស់ Britannica។ រឿងដែលនឹកស្មានមិនដល់នោះគឺ ក្រុមហ៊ុន Pepsi ធ្លាប់ប្រកាសក្ស័យធន់ដល់ទៅ ២ លើក។ លើកទីមួយនៅឆ្នាំ ១៩២៣ ដោយសារផលប៉ះពាល់ពីសង្រ្គាមលោកលើទី១ បានធ្វើឲ្យសារធាតុផ្សំមានការកើនឡើងខ្ពស់ បូករួមនិងថ្លៃផលិតក៏កើនឡើងផងនោះ ទើបក្រុមហ៊ុនមិនអាចទ្រទ្រង់បានតទៅទៀត។ បន្ទាប់ពីទទួលបានជំនួយពី Roy Megargel ក្រុមហ៊ុនក៏ងើបឡើងម្តងទៀត ប៉ុន្តែនៅឆ្នាំ ១៩៣១ Pepsi ត្រូវបានប្រកាសក្ស័យធន់ជាលើកទី២។

នៅឆ្នាំដដែលនោះ ម្ចាស់ក្រុមហ៊ុន Loft Candy’ លោក Charles Guth  បានទិញយកក្រុមហ៊ុន Pepsi ក្នុងតម្លៃ $១០,៥០០​​។ លោកបានរៀបចំផ្លាស់ប្តូររូបរាង Pepsi ថ្មី ជាមួយនឹងរូបមន្តថ្មី។ ក្រៅពីនេះ លោកក៏បានដាក់លក់ចំណុះដប ១២អោន ក្នុងតម្លៃ ៥សេនប៉ុណ្ណោះ ដើម្បីដំណើរការទីផ្សារ Pepsi ឡើងវិញ។

កេរ្តិ៍ឈ្មោះ Pepsi កាន់តែល្បីល្បាញនៅក្នុងឆ្នាំ ១៩៥០ បន្ទាប់ពីចេញនូវពាណិជ្ជកម្មជាសម្លេងដំបូងមិនធ្លាប់មានគឺ  “Pepsi Nickel” និងមួយទៀតគឺ “The Pepsi Challenge” ជាពាណិជ្ជកម្មដ៏ជោគជ័យមួយដែលអាចឲ្យ Pepsi រកចំណូលនិងចំណេញកាន់តែច្រើនពីទីផ្សារ។

បច្ចុប្បន្ននេះ Pepsi គឺជាក្រុមហ៊ុនភេសជ្ជៈដ៏ល្បីលំដាប់ទី ២ នៅលើពិភពលោក​ ដែលបានដំណើរការអស់រយៈពេល ១៣២ ឆ្នាំ នៅលើឧស្សាហកម្មភេសជ្ជៈ។ ពីក្រុមហ៊ុនដែលប្រកាសក្ស័យធន់ដល់ទៅ ២លើក ប៉ុន្តែក្លាយជាម៉ាកយីហោវ័យចំណាស់មួយដែលល្បីល្បាញ និងមានវត្តមានទូទាំងពិភពលោក។