DoorDash គឺជាក្រុមហ៊ុនដឹកជញ្ជូនអាហារមួយរបស់សហរដ្ឋអាមេរិកដែលបង្កើតឡើងដោយលោក Tony Xu នៅក្នុងឆ្នាំ ២០១៣។ លោកជាជនជាតិចិនមានស្រុកកំណើតនៅទីក្រុង ណានជីង ប៉ុន្តែបានផ្លាស់មករស់នៅអាមេរិកតាំងពីអាយុ ៤ ឆ្នាំ។ Tony Xu បានបញ្ចប់ការសិក្សានៅសកលវិទ្យាល័យ កាលីហ្វរញ៉ា និងរៀនបន្តនៅសាលា Stanford Graduate School of Business។
លោកមិនមានគម្រោងក្នុងការបង្កើតក្រុមហ៊ុនដឹកជញ្ជូននោះទេ ប៉ុន្តែបន្ទាប់ពីលោកចុះសម្ភាសស្ថានភាពអាជីវកម្មមួយកន្លែងនៅទីក្រុង Palo Alto។ អាជីវករនៅទីនោះ មានការត្អូញត្អែរជាមួយនឹងកង្វះខាតអ្នកដឹកជញ្ជូន ពីព្រោះក្រុមហ៊ុនដឹកជញ្ជូនតែងតែសហការជាមួយហាងធំៗ មើលរំលងអាជីវកម្មខ្នាតតូច និងមធ្យម ធ្វើឲ្យប៉ះពាល់ខ្លាំងដល់អាជីវកម្មពួកគេ។ ទើបលោកចាប់ផ្តើមគំនិតបង្កើតក្រុមហ៊ុន DoorDash ឡើង ដើម្បីដោះស្រាយបញ្ហាទាំងនោះ។
លោករៀននៅពេលថ្ងៃ និងទទួលការដឹកជញ្ជូននៅពេលយប់ដោយប្រើប្រាស់យាន្តជំនិះផ្ទាល់ខ្លួន។ ក្រោយមកទើបលោកសម្រេចចិត្តផ្អាកការសិក្សា បកមកផ្តោតលើអាជីវកម្មលោកពេញលេញវិញ។ DoorDash ខុសពីក្រុមហ៊ុនដទៃ ពីព្រោះលោក Tony ស្វែងរកអាជីវកម្មខ្នាតតូច និងមធ្យមដែលមិនធ្លាប់ផ្តល់សេវាកម្មដឹកជញ្ជូនពីមុន ចំណែកលោកវិញគឺជាអ្នកដឹកជញ្ជូនដោយផ្ទាល់។
នៅឆ្នាំ ២០១៣ ក្រុមហ៊ុន DoorDash ក៏ទទួលបានកញ្ចប់ថវិការដំបូងគេ $១២០,០០០ ពី Y Combinator ដើម្បីធ្វើជាដើមទុនសម្រាប់ដំណើរការក្រុមហ៊ុន និងពង្រឹងសេវាកម្មឲ្យបានល្អជាងមុន។ ពេលនោះ អេប DoorDash ក៏ត្រូវបានបង្កើតឡើង សម្រាប់ដាក់ប្រើប្រាស់ឲ្យបានទូលំទូលាយជាងមុន។
នៅឆ្នាំ ២០១៧ DoorDash ក្លាយជាសេវាកម្មដឹកជញ្ជូនពេញនិយមមួយ ដែលមានចំនួនអ្នកប្រើប្រាស់កើនឡើងគួរឲ្យកត់សម្គាល់។ រីឯនៅឆ្នាំ ២០២០ DoorDash Drive និង Dashmart ត្រូវបានបញ្ចូលក្នុងកម្មវិធី DoorDash ប្រែក្លាយជាកម្មវិធីដែលមានសេវាកម្មច្រើនសម្បូរបែប។
បច្ចុប្បន្ន DoorDash ត្រូវបានគេស្គាល់ និងប្រើប្រាស់យ៉ាងទូលំទូលាយនៅសហរដ្ឋអាមេរិក រួមទាំងអាចពង្រីកទៅ ៣០ ប្រទេសទៀត។ ថ្មីៗនេះ ត្រូវបានដឹងថាចំណូលដែលពួកគេរកបានអាចនឹង ១១ ពាន់លានដុល្លារ ជាមួយនឹងអ្នកប្រើប្រាស់កម្មវិធីនេះមានដល់ទៅចំនួន ៣២ លាននាក់។