ថៃ ថាសល់លុយ ៣០០ពាន់លានបាតទៀត ដើម្បីប្រយុទ្ធប្រឆាំងនឹងកូវីដ១៩

រដ្ឋាភិបាលថៃបានទទូចថា ខ្លួនមានថវិកាយ៉ាងតិច ៣០០ ពាន់លានបាតទៀត ដើម្បីប្រយុទ្ធប្រឆាំងនឹងការផ្ទុះឡើងនៃជំងឺកូវីដ១៩។

ពាណិជ្ជកម្ម

លោក Dechapiwat Na Songkhla នាយកការិយាល័យថវិកាជាតិថៃ បាននិយាយថា ថវិកាចំនួន ៣០០ ពាន់លានបាត អាចប្រើដើម្បីទប់ស្កាត់ការឆ្លងថ្មី បានមកពីថវិកាសារពើពន្ធឆ្នាំ ២០២១ ដែលក្នុងនោះ ៤០ ពាន់លានបាត ត្រូវបានទុកជាថវិកាកណ្តាល (central budget)។

ក្នុងចំណោមថវិកាកណ្តាលចំនួន ៤០ ពាន់លានបាតនោះ មានចំនួន ២០ ពាន់លានបាត ត្រូវបានបម្រុងទុកសម្រាប់ការចាក់វ៉ាក់សាំង, ផ្តល់រង្វាន់ដល់បុគ្គលិកសុខាភិបាល និងការកសាងមន្ទីរពេទ្យនៅតាមមូលដ្ឋាន។

លោក Dechapiwat បានមានប្រសាសន៍ថា “យើងនៅតែជឿជាក់ថា ថវិកាដែលយើងបានបម្រុងទុក គឺគ្រប់គ្រាន់ដើម្បីគ្រប់គ្រងការផ្ទុះឡើងថ្មី ប្រសិនបើវាមិនរីករាលដាលពាសពេញប្រទេស”។

លោក Dechapiwat បានបន្ថែមថា រដ្ឋាភិបាលទើបតែបានចំណាយត្រឹមតែ ៤ ពាន់លានបាត ទៅលើធនធានមនុស្សនិងការសាកល្បងក្នុងអំឡុងរលកទីពីរប៉ុណ្ណោះ។

យោងតាមលោក Dechapiwat រដ្ឋាភិបាលថៃនៅតែមានកញ្ចប់ថវិកាបន្ថែមទៀត នៅក្នុងច្បាប់ថវិកាចំណាយប្រចាំឆ្នាំ (Annual Expenditure Budget Act) សម្រាប់ឆ្នាំ ២០២១ ឬថវិកាកណ្តាលក្នុងករណីមានភាពអាសន្ន ដែលត្រូវបានកំណត់ចំនួន ៩៩ ពាន់លានបាត សម្រាប់ប្រើប្រាស់ក្នុងករណីមានគ្រោះមហន្តរាយធម្មជាតិ៕