បន្ទាប់ចាប់ប្រកាសចាប់ផ្តើមប្រតិបត្តិការឡើយវិញនៅក្នុងឆ្នាំ 2009 ពេលនេះ រោងចក្រផលិតស្មាតហ្វូនរបស់ក្រុមហ៊ុន Samsung ដែលជាក្រុមហ៊ុនបច្ចេកវិទ្យាធំជាងគេមួយនៅលើពិភពលោក បានផលិតស្មាតហ្វូនបានជាង 2 ពាន់លានគ្រឿងហើយ ដោយក្នុងនោះ ចំនួននេះគឺលើសរោងចក្រនៅឥណ្ឌា និងកូរ៉េខាងត្បូង នេះបើយោងតាមការចេញផ្សាយដោយ VietnamPlus ។
ចំពោះរោងចក្ររបស់ក្រុមហ៊ុន Samsung នៅក្នុងប្រទេសវៀតណាមនេះ គឺមានទីតាំងស្ថិតនៅក្នុងខេត្ត Bac Ninh និង Thai Nguyen ហើយវាគឺជាមជ្ឈមណ្ឌលផលិតដ៏សំខាន់ ដោយផលិតទូរស័ព្ទចាប់ពីម៉ូដែលថវិកា រហូតដល់ម៉ូដែលឈានមុខ និងទូរស័ព្ទបត់បានដូចជា Galaxy Z Fold 7 ជាដើម។ សម្រាប់ផលិតផលភាគច្រើនត្រូវបាននាំចេញទៅកាន់អាមេរិកខាងជើង និងទីផ្សារធំៗផ្សេងៗទៀត។
ក្នុងនោះ នៅក្នុងឆមាសទី១ នៃឆ្នាំ 2025 នេះ ក្រុមហ៊ុន Samsung Vietnam ទទួលបានប្រាក់ចំណូលដល់ទៅ 31.6 ពាន់លានដុល្លារ ឯណ្ណោះ ដែលក្នុងនោះ 28 ពាន់លានដុល្លារគឺបានមកពីការនាំចេញ។ បច្ចុប្បន្ន ក្រុមហ៊ុនមានបុគ្គលិកជាង 100,000 នាក់ ហើយបានក្លាយជាអ្នកវិនិយោគបរទេសធំបំផុតនៅក្នុងវិស័យឧស្សាហកម្មបច្ចេកវិទ្យារបស់វៀតណាម។
ជាមួយគ្នានេះ ក្រុមហ៊ុន Samsung ផ្ទាល់ ក៏គ្រោងនឹងពង្រើកទំហំប្រតិបត្តិការរបស់ខ្លួននៅក្នុងប្រទេសវៀតណាមនាពេលអនាគតផងដែរ ពោលគឺដើម្បីប្រកួតប្រជែងជាមួយក្រុមហ៊ុន Apple និង Xiaomi ៕