Tesla បានដាក់ពាក្យសុំអាជ្ញាប័ណ្ណលក់សម្រាប់រថយន្ត Model Y L ដែលមានចំនួនកៅអី ៦ ដល់អាជ្ញាធរចិន ដោយបង្ហាញពីលក្ខណៈបច្ចេកទេសសំខាន់ៗ។ រថយន្តនេះមានប្រវែងវែងជាងមុន បរិមាណខ្ពស់ជាងមុន និងមានគម្លាតកង់វែងជាងមុនផងដែរ។ ព័ត៌មានបច្ចេកទេសបង្ហាញថាវាមានសមត្ថភាពម៉ូទ័រខ្លាំងជាងមុនផងដែរ។
Model Y L គឺជាជម្រើសថ្មីដែលមានទំហំធំជាងរថយន្ត Model Y ដើម និងមានកៅអីបីជួរ ដែលអាចអង្គុយបានចំនួនសរុប ៦ នាក់។ ព័ត៌មាននេះអះអាងនៅក្នុងឯកសារដាក់ស្នើសុំអាជ្ញាប័ណ្ណលក់ទៅកាន់ក្រសួងឧស្សាហកម្ម និងព័ត៌មានវិទ្យាចិន (MIIT)។ Tesla បានប្រកាសផ្លូវការថា Model Y L នឹងចេញលក់នៅរដូវស្លឹកឈើជ្រុះក្នុងប្រទេសចិន (ក្នុងរយៈខែសីហា ទៅដល់ខែតុលាឬវិច្ឆិកា)។
រថយន្ត Model Y L មានទំហំបណ្តោយប្រវែង 4,976 mm, ទទឹង 1,920 mm, កម្ពស់ 1,668 mm និងគម្លាតកង់វែងជាងមុនដល់ទៅ 3,040 mm (វែងជាងម៉ូដែល ៥ កៅអី 150 mm)។ ទំងន់រថយន្តគឺ 2,088 គីឡូក្រាម ដែលធ្វើឲ្យវាធ្ងន់ជាងម៉ូដែល ៥ កៅអីចំនួន 96 គីឡូក្រាម។ វាប្រើថ្ម ternary NMC មកពីក្រុមហ៊ុន LG។
ប្រព័ន្ធដំណើរការរបស់រថយន្ត SUV អគ្គិសនីថ្មីនេះគឺ AWD (All-Wheel Drive) មានម៉ូទ័រចំនួន ២ ដាក់នៅខាងមុខ និងខាងក្រោយម៉ូទ័រខាងមុខផលិតថាមពល 142 kW និងម៉ូទ័រខាងក្រោយផលិតថាមពល 198 kW វាផ្តល់ថាមពលសរុប 340 kW (ប្រហែល 456 hp)
ល្បឿនលើគេអាចទៅដល់ 201 km/h។
Model Y L ដែលមានគម្លាតកង់វែង នឹងប្រកួតប្រជែងជាមួយរថយន្ត ៦ និង ៧ កៅអីផ្សេងទៀតនៅចិនដូចជា Onvo L90, BYD Tang L, Huawei Aito M9 និង Li Auto i8 ហើយគេរំពឹងថាតម្លៃប្រហែលជា 41,800 ដុល្លារ។
