បន្ទាប់ពីមានការជួបពិភាក្សាគ្នារវាងលោក Jensen Huang ដែលជាប្រធាន និងជានាយកប្រតិបត្តិរបស់ក្រុមហ៊ុន Nvidia ជាមួយនឹងប្រធានាធិបតីសហរដ្ឋអាមេរិកលោក Donald Trump ពេលនេះ ក្រុមហ៊ុនបច្ចេកវិទ្យាយក្សមួយនេះបានប្រកាសគ្រោងនឹងវិលត្រលប់ទៅរកសុីនៅក្នុងទីផ្សារចិនវិញហើយ បន្ទាប់ពីខាតបង់ប្រាក់ចំណូលជាង ១៥ ពាន់លានដុល្លារ។
ក្នុងនោះ ក្រុមហ៊ុន Nvidia គឺបាន កំពុងនឹងស្នើសុំអាជ្ញាប័ណ្ណពីរដ្ឋាភិបាលសហរដ្ឋអាមេរិក ដើម្បីអនុញ្ញាតឲ្យមានការចាប់ផ្តើមលក់នូវបន្ទះឈីប AI ប្រភេទ H20 របស់ខ្លួននៅទីផ្សារចិនវិញ។ ជាមួយគ្នានេះ ដើម្បីឆ្លើយតបនឹងការរឹតបន្តឹងការនាំចេញ ពួកគេក៏បានបង្ហាញចេញនូវផលិតផលថ្មីរបស់ខ្លួនគឺ RTX Pro GPU ផងដែរ ដែលរចនាឡើងជាពិសេសសម្រាប់ប្រទេសចិន។
គួរបញ្ជាក់ថា ក្នុងដំណើរទស្សនៈកិច្ចរបស់លោក Jensen Huang ទៅកាន់ប្រទេសចិន លោកគឺបាននិយាយថា ចំពោះមូលហេតុដែលក្រុមហ៊ុនខ្លួនចង់វិលត្រលប់ទៅរកសុីនៅក្នុងប្រទេសចិនវិញ គឺដោយសារតែប្រទេសចិនគឺជាទីផ្សារសំខាន់មួយសម្រាប់អនាគតរបស់ក្រុមហ៊ុន Nvidia បើទោះបីជាមានការប្រកួតប្រជែងពីសំណាក់ក្រុមហ៊ុន Huawei ក៏ដោយ៕