បន្ទាប់ពីបានប្រកាសចេញនូវស្មាតហ្វូន vivo X200 របស់ខ្លួនកាលពីចុងឆ្នាំមុន ពេលនេះ នៅសល់រយៈពេលតែ ៤ ខែទៀតប៉ុណ្ណោះ ស្មាតហ្វូនសេរ៊ីថ្មីរបស់ក្រុមហ៊ុន vivo គឺ X300 Series នឹងប្រកាសចេញជាផ្លូវការហើយ ដោយនឹងធ្វើឡើងនៅក្នុងខែតុលា ខាងមុខនេះ នៅក្នុងទីផ្សារប្រទេសចិន។
ក្នុងនោះ ចំណុចមួយដែលគេជឿជាក់មួយរយភាគរយនោះគឺ X300 Series នឹងដំណើរការដោយឈីប Dimensity 9500 របស់ក្រុមហ៊ុន MediaTek ។ លើសពីនេះ បើយោងតាម Digital Chat Station គឺបានឲដឹងថា ស្មាតហ្វូនសេរ៊ីថ្មីក៏នឹងទទួលបាននូវលេនគោលថ្មីទំហំ 200MP 1/1.4″ ផងដែរ ពោលគឺនឹងមិនប្រើប្រាស់នូវលេន 50MP Sony LYT-818 1/1.28″ ដូចនឹង X200 Series ទៀតនោះឡើយ។
ជាមួយគ្នានេះ សម្រាប់ X300 ធម្មតា ក៏នឹងទទួលបាននូវលេន 50MP ultra-wide និងលេន 50MP IMX882 3X telephoto រួមជាមួយអេក្រង់ OLED ទំហំ 6.3 អ៊ីញ 120Hz ក៏ដូចជាម៉ាស៊ីនស្កេនក្រយៅដៃ 3D ultrasonic និងអាវការពារកម្រិត IP68 + IP69 ផងដែរ ខណៈព័ត៌មានលម្អិតផ្សេងៗទៀតមិនទាន់បង្ហាញចេញនៅឡើយទេ៕