នៅថ្ងៃទី 9 ខែកក្កដា កន្លងមកនេះ Sina Tech បានផ្សព្វផ្សាយបទសម្ភាសន៍ជាមួយលោក Li Tianyuan ដែលជាប្រធានគ្រប់គ្រងទូទៅផ្នែកឧស្សាហកម្មរបស់ Xiaomi Auto និងជារងប្រធានគណៈកម្មាធិការរចនារបស់ក្រុមហ៊ុន Xiaomi Group។ ក្នុងសម្ភាសន៍នោះ លោកបាននិយាយអំពីទស្សនៈស្នូលនៃការរចនារបស់ក្រុមហ៊ុន ក៏ដូចជាបានឆ្លើយតបចំពោះប្រតិកម្មសាធារណៈអំពីការរចនារបស់រថយន្ត SU7 និង YU7 ព្រមទាំងពិភាក្សាអំពីតួនាទីកាន់តែមានសារៈសំខាន់របស់អ្នករចនាចិននៅក្នុងឧស្សាហកម្មរថយន្តសកល។
លោក Li បានផ្តោតសំខាន់លើការបង្កើតបទពិសោធន៍ផ្នែកអារម្មណ៍ជាមួយរថយន្ត ជាងគ្រាន់តែប្រើលក្ខណៈបច្ចេកទេសធម្មតា ដោយលោកបាននិយាយថា៖ “អ្វីដែលធ្វើឲ្យយើងមិនអាចបំភ្លេចបាន គឺមិនមែនជាអំណោយទេ ប៉ុន្តែជាអារម្មណ៍ដែលវាបានកើតក្នុងចិត្ត” គាត់បានអះអាងថា “តម្លៃនៃអារម្មណ៍” គឺជាចំណុចស្នូលសម្រាប់គោលបំណងរចនារបស់ Xiaomi Auto។
ក្រុមរចនារបស់ Xiaomi Auto មានពាក្យស្លោករចនាផ្ទៃក្នុងចំនួន ៣៖ 1. រចនាដោយស្របតាមវិទ្យាសាស្ត្រ, 2.រចនាដោយស្របទៅនឹងច្បាប់ធម្មជាតិ, 3.រចនាដោយផ្អែកលើអារម្មណ៍នៅខាងក្នុង (ចិត្ត)។
លោកបានបញ្ជាក់ថាក្រុមអ្នករចនាបានយកតាមគោលការណ៍ទាំងនេះគ្រប់ដំណាក់កាល ដើម្បីធានាថាផលិតផលរបស់ពួកគេស្របតាមតម្លៃរបស់ម៉ាក Xiaomi។ លើសពីនេះ លោក Li បានឆ្លើយតបទៅនឹងការរិះគន់និងការប្រៀបធៀបបែបចំអកតាមអនឡាញដែលអះអាងថា ការរចនារថយន្ត SU7 ស្រដៀងនឹង Porsche Taycan និងរចនារថយន្ត YU7 ស្រដៀងនឹង Ferrari Purosangue។ តាមពិតទៅលទ្ធផលនៃការសង្កេតនេះ បានបង្កើតនូវនាមល្បីៗនៅលើបណ្ដាញសង្គមចិន ដូចជា៖ “Mi-shijie” ជាការរួមបញ្ចូលរវាង “Mi” (អក្សរកាត់របស់ Xiaomi) និង “Shijie” (សូរបែប Porsche ជាភាសាចិន “Bǎoshíjié”) “Fala-mi” រួមបញ្ចូល “Fala” (អក្សរកាត់របស់ Ferrari, 法拉利) និង “Mi” (Xiaomi)
លោក Li មិនបានឆ្លើយតបដោយផ្ទាល់ទៅនឹងនាមទាំងនោះទេ ប៉ុន្តែបានបញ្ជាក់ថា ការសំខាន់សម្រាប់ Xiaomi គឺការបង្កើតរចនាដែលអាចភ្ជាប់អារម្មណ៍ជាមួយអ្នកប្រើ គាត់បានថែមថា ការពិភាក្សាសាធារណៈទាំងនេះ មិនបានប៉ះពាល់អវិជ្ជមានដល់ការលក់ឡើយទេ ផ្ទុយទៅវិញ វាអាចជួយបង្កើតការចាប់អារម្មណ៍កាន់តែច្រើន ស្ដីអំពីតួនាទីអ្នករចនាចិននៅក្នុងទីផ្សារសកល លោកបានបញ្ជាក់ថា ទោះជាឧស្សាហកម្មរថយន្តចិនមិនមានប្រវត្តិសាស្ត្ររយៈពេលយូរដូចអឺរ៉ុប ឬ អាមេរិកក៏ដោយ វាក៏អាចជាឱកាសដ៏ល្អ។
សម្ដីទាំងនេះមានមូលដ្ឋានលើបទពិសោធន៍អន្តរជាតិដោយលោក Li បានចូលរួមជាអ្នករចនាជនជាតិចិនដំបូងនៅក្នុងក្រុម BMW Designworks Shanghai ក្នុងឆ្នាំ 2012 បន្ទាប់មក លោកបានបន្តទៅកាន់ផ្នែក BMW i និង M ក្នុងឆ្នាំ 2016 និងបានចូលរួមក្នុងគម្រោងរចនាផ្សេងៗរបស់ BMW, MINI និង Rolls-Royce។ Xiaomi Auto ក៏បានបញ្ជាក់ពីរចនារថយន្ត YU7 និង SUV ថាជាការបន្តនិងការបង្កើតថ្មីរបស់ភាសារចនារបស់ម៉ាក Xiaomi ដែលមានគោលបំណងឲ្យរចនានេះអាចឈររឹងមាំបានក្នុងរយៈពេលវែង។