បន្ទាប់ពីបានប្រកាសចេញនូវ Redmi K80 និង Redmi K80 Pro ក្នុងពេលថ្មីៗនេះ ក្រុមហ៊ុន Redmi ត្រូវបានគេរាយការណ៍ថា នឹងប្រកាសចេញស្មាតហ្វូនខ្នាតកំពូលរបស់ខ្លួនមួយម៉ូឌែលទៀតនៅក្នុងត្រកូល K80 Series នៅក្នុងពេលឆាប់ៗខាងមុខនេះ។
ក្នុងនោះ បើយោងតាមលោក Wang Teng ដែលជាអ្នកគ្រប់គ្រងទូទៅរបស់ក្រុមហ៊ុន Redmi ផ្ទាល់បានឲដឹងថា ស្មាតហ្វូនសេរ៊ីថ្មីមួយម៉ូឌែលនេះគឺ Redmi K80 Ultra ហើយនឹងប្រកាសចេញជាផ្លូវការនៅក្នុងទីផ្សារចិននៅក្នុងខែមិថុនាខាងមុខនេះ ជាមួយតម្លៃលក់ចាប់ពី 3,000 យន់ ឬ ៤១៦ ដុល្លារ ប៉ុណ្ណោះ។
ចំពោលក្ខណៈសម្បត្តិរបស់ទូរស័ព្ទនេះ ត្រូវបានគេរាយការណ៍ថា នឹងទទួលបាននូវអេក្រង់រាបស្មើ OLED ទំហំ ៦,៨៣ អ៊ីញ ដំណើរការដោយឈីប MediaTek Dimensity 9400+ និងគាំទ្រម៉ាសុីនស្កេនម្រាមដៃ ultrasonic និងអាវការពារទឹក និងធូលី IP68 និង IP69 ។
ទៅលើផ្នែកកាមេរ៉ាវិញ នឹងមានការរចនាកាមេរ៉ាក្រោយមានចំនួន ៣ ដែលក្នុងនោះគឺមានលេនគោល 50MP ។ ចំណែកផ្នែកថាមពលថ្ម អាចនឹងមានទំហំធំដល់ 7,500 mAh គាំទ្រការសាកកម្លាំង 100W តាមខ្សែ ខណៈព័ត៌មានលម្អិតផ្សេងទៀតមិនទាន់បង្ហាញចេញនៅឡើយទេ៕