បន្ទាប់ពីបានប្រកាសចេញនូវស្មាតហ្វូនសេរ៊ីថ្មីរបស់ខ្លួនគឺ Redmi Turbo 4 នៅក្នុងខែមករា, ពេលនេះបើយោងតាមលោក Wang Teng ដែលជាអ្នកគ្រប់គ្រងទូទៅនៃនាយកដ្ឋានទីផ្សារប្រទេសចិនរបស់ Xiaomi និងជាអ្នកគ្រប់គ្រងទូទៅនៃម៉ាក Redmi បានប្រកាសឲដឹងថា ស្មាតហ្វូនបងធំរបស់ Redmi Turbo 4 គឺ Redmi Turbo 4 Pro នឹងប្រកាសចេញជាផ្លូវការនៅសប្តាហ៍ក្រោយនេះ ពោលគឺអាចនឹងធ្វើឡើងនៅថ្ងៃទី 24 ខែមេសា ខាងមុខនេះតែម្តង។
ក្នុងនោះ Redmi Turbo 4 Pro ត្រូវបានបញ្ជាក់ច្បាស់ៗថានឹងទទួលបាននូវអេក្រង់ LTPS OLED ទំហំ 6.83 អ៊ីញ មានកម្រិតភាពច្បាស់ 1.5K ដំណើរការដោយបន្ទះឈីប Snapdragon 8s Gen 4 មាន RAM ដល់ទៅ 16GB ដែលអាចគ្រប់គ្រងកម្មវិធីជាច្រើនក្នុងពេលតែមួយបានយ៉ាងមានប្រសិទ្ធភាព និងអង្គផ្ទុកទិន្នន័យ UFS 4.0 ដល់ទៅ 1TB ។ លើសពីនេះ មិនត្រឹមតែមាន Specs ខ្ពស់ប៉ុណ្ណោះទេ ប៉ុន្តែថែមទាំងមានថាមពលថ្មធំដល់ទៅ 7,550 mAh ទៀតផង និងគាំទ្រការសាកលឿនកម្លាំង 90W ។
ទៅលើផ្នែកកាមេរ៉ាវិញ មានកាមេរ៉ាមេទំហំ 50 MP ជាមួយនឹងមុខងារ OIS និងលេន 8 MP ultrawide នៅខាងក្រោយ និងកាមេរ៉ាទំហំ 20 MP សម្រាប់ថតរូប Selfie ។ ទូរស័ព្ទនេះ មានខ្នាតប្រវែង 163.1 mm ទទឹង 77.93 mm កម្រាស់ 7.98 mm ទម្ងន់ 219g និងជម្រើសពណ៌ស ខ្មៅ និងបៃតង ជាមួយតម្លៃលក់ចាប់ពី CNY 2,099 (ប្រហែល $287 USD)៕
