ចាប់តាំងពីចេញលក់លើកដំបូងនៅឆ្នាំ 2007 មក, iPhone គឺជាស្មាតហ្វូនតែមួយគត់ដែលទទួលបានការពេញនិយមខ្ពស់បំផុតរបស់ក្រុមហ៊ុន Apple ហើយបានផ្លាស់ប្តូរបែបផែននៃការប្រើប្រាស់ស្មាតហ្វូនរបស់មនុស្សទូទាំងពិភពលោក។ នៅឆ្នាំ 2027 ខាងមុខនេះ នឹងជាឆ្នាំគួរឱ្យចាប់អារម្មណ៍ ពីព្រោះវាជាខួបអនុស្សាវរីយ៍ 20 ឆ្នាំនៃ iPhone ហើយក៏ជាពេលវេលាសំខាន់ដែល Apple នឹងបង្ហាញការរចនាថ្មីដ៏ធំមួយសម្រាប់ស្មាតហ្វូននេះផងដែរ។
បើយោងតាមលោក Mark Gurman របស់ Bloomberg បានរាយការណ៍ថា Apple បាន និងកំពុងអភិវឌ្ឍន៍ iPhone ដែលអាចបត់បានជាលើកដំបូង ហើយរំពឹងថានឹងប្រកាសជាផ្លូវការនៅឆ្នាំ 2027 ដើម្បីប្រកួតប្រជែងជាមួយក្រុមហ៊ុន Samsung និង Huawei។ ជាពិសេស iPhone 19 Pro ដែលនឹងចេញក្នុងពេលនោះ ក៏នឹងមកជាមួយនឹងការរចនាថ្មីផងដែរ ដោយគេសន្មតថា តួខ្លួនរបស់ស្មាតហ្វូននេះនឹងផលិតចេញពីកញ្ចក់ច្រើនជាងមុន មានរូបរាងស្តើង រលោង និងអេក្រង់ធំ ដែលអាចបត់ជុំវិញបាន ដូចជាគំរូ Xiaomi Mix Alpha។ ស្របពេលដែលគំនិតនេះត្រូវបាននឹកឃើញដោយអតីតប្រធានផ្នែករចនារបស់ក្រុមហ៊ុន Apple លោក Jony Ive តាំងពីឆ្នាំ 2017 មកម្លេះ។
ប៉ុន្តែក្នុងនោះ ពួកគេក៏បានបញ្ជាក់ផងដែរថា iPhone 17 Pro ដែលនឹងប្រកាសចេញនៅក្នុងពេលឆាប់ៗនេះ នឹងមានការកែលម្អខ្លះៗតែប៉ុណ្ណោះ ពោលគឺនឹងមិនមានការអាប់ឌែតដូចរូបភាព render និងសារព៌ត័មានមួយចំនួនបានណែនាំនោះទេ ប៉ុន្តែ iPhone 17 Pro នឹងមានការកែលម្អទៅលើកាមេរ៉ាផ្នែកខាងមុខដែលប្រសើរជាងមុន ជាមួយនឹងការផ្លាស់ប្តូរពណ៌ និងរចនាបទតិចតួច ហើយបន្តប្រើពណ៌ដូចម៉ូដែល iPhone 16 Pro បច្ចុប្បន្នដដែល ខណៈព៌ត័មានលម្អិតផ្សេងទៀតនឹងបន្តអាប់ឌែតជូនបងប្អូននៅពេលក្រោយ៕
