កាលពីពេលថ្មីៗនេះ ក្រុមហ៊ុន Apple បានប្រកាសចេញនូវ Apple Mac Studio ថ្មី ប្រើប្រាស់នូវឈីប 3nm ខ្នាតកំពូលរបស់ខ្លួនគឺ M3 Ultra ដែលមាន CPU សរុបដល់ទៅ 32-core អាចដំណើរការបានលឿនជាង M2 Ultra ដល់ទៅ 1.5 ដង និងលឿនជាង M1 Ultra ចំនួន 1.8 ដង រួមជាមួយ GPU 80-core ផ្តល់ក្រាហ្វិកលឿនជាង M2 Ultra ចំនួន 2 ដង និងលឿនជាង M1 Ultra ចំនួន 2.6 ដង គាំទ្រការដាក់អង្គចងចាំដល់ 512GB មានល្បឿន 800GB/s និង SSD 16TB ។ លើសពីនេះ វាក៏ទទួលបាននូវ 32-core Neural Engine ផងដែរ ដែលអាចដំណើរការមុខងារជាច្រើនរបស់ Apple Intelligence បានយ៉ាងរលូន។
មិនត្រឹមតែមាន Specs កប់ប៉ុណ្ណោះទេ ថែមទាំងអាចចាក់វីដេអូ 8K ProRes រហូតដល់ 24 streams និងភ្ជាប់ម៉ូនីទ័ររហូតដល់ 8 ក្នុងពេលតែមួយទៀតផង។
គួរឲដឹងថា Apple Mac Studio ថ្មី គឺទទួលបានរន្ធ Thunderbolt 5 ចំនួន ៦ មានល្បឿនផ្ទេរ 120 GB/s លឿនជាងកំណែ Thunderbolt ពីមុនចំនួន 2 ដង, រន្ធ USB-A ចំនួន ២, រន្ធ HDMI 2.1 ចំនួន ១, រន្ធ Ethernet 10Gb ចំនួន ១, រន្ធដោតកាស 3.5mm ចំនួន ១ និងរន្ធ SD កាតប្រភេទ SDXC ចំនួន ១ គាំទ្រការភ្ជាប់ Wi-Fi 6E និង Bluetooth 5.3 មានតម្លៃលក់ត្រឹមតែ ១៤ ០៩៩ ដុល្លារ ប៉ុណ្ណោះ នៅក្នុងទីផ្សារអាមេរិក សម្រាប់ជម្រើស 512GB បូក 16TB ។
បន្ថែមពីនេះ Apple ក៏បានប្រកាសចេញនូវ MacBook Air ថ្មីរបស់ខ្លួនផងដែរ ផ្តល់ជូនទាំងជម្រើសអេក្រង់ទំហំ ១៣ អ៊ីញ និង ១៥ អ៊ីញ ជាមួយនឹងបន្ទះឈីប M4 ចុងក្រោយបង្អស់មានស៊ីភីយូ 10-core, GPU 10-core និង 16-core Neural Engine បូករួមជាមួយ RAM និង SSD រហូតដល់ 32GB និង 2TB មានប្រសិទ្ធភាពថាមពលថ្មដល់ 18 ម៉ោង ទទួលបានកាមេរ៉ាថ្មីទំហំ 12MP មានតម្លៃលក់ទាបជាងមុនចំនួន ១០០ដុល្លារ ជាមួយជម្រើសពណ៌ខៀវថ្មី ក្នុងតម្លៃចាប់ផ្តើមពី ៩៩៩ និង ១ ១៩៩ ដុល្លារ៕
