ក្រុមហ៊ុន Xiaomi ត្រូវបានគេរាយការណ៍ថា កំពុងធ្វើការលើស្មាតហ្វូន Redmi Turbo 4 Pro ដែលជាស្មាតហ្វូនសេរ៊ីថ្មីរបស់ពួកគេ បន្ទាប់ពីដាក់បង្ហាញចេញ Redmi Turbo 4 ជាមួយនឹង Dimensity 8400-Ultra កាលពីខែមុននៅក្នុងប្រទេសចិន។
ក្នុងនោះ Redmi Turbo 4 Pro ត្រូវបានរំពឹងថា នឹងបំពាក់ដោយបច្ចេកវិទ្យាចុងក្រោយបំផុត ដែលមានសមត្ថភាពខ្ពស់សម្រាប់អ្នកប្រើប្រាស់ ពោលគឺវាអាចនឹងដំណើរការដោយបន្ទះឈីប Qualcomm Snapdragon 8s Elite (SM8735) ដែលផ្តល់នូវល្បឿនដំណើរការល្អ និងប្រសិទ្ធភាពខ្ពស់ជាងមុខសម្រាប់កិច្ចការ និងការលេងហ្គេម រួមជាមួយ RAM 12GB ឬ 16GB និងផ្ទុកទិន្នន័យ 256GB ឬ 512GB ប្រើបច្ចេកវិទ្យា UFS 4.0 ដែលធ្វើឱ្យការប្រើប្រាស់ទិន្នន័យមានល្បឿនកាន់តែលឿន។
ស្មាតហ្វូនមួយនេះ ក៏អាចនឹងទទួលបានអេក្រង់ AMOLED ទំហំ 6.73 អ៊ីញ ផងដែរ មានគុណភាព 1.5K បំពាក់ថ្មធំដល់ 7,500mAh+ ដែលអាចប្រើប្រាស់បានយូរមិនចាំបាច់សាកឡើងវិញ គាំទ្របច្ចេកវិទ្យាសាកល្បឿនលឿន 90W ប៉ុន្តែមិនគាំទ្រការសាកឥតខ្សែទេ។
ទៅលើផ្នែកកាមេរ៉ា អាចនឹងទទួលបានកាមេរ៉ាគោល 50MP មានបច្ចេកវិទ្យា OIS (Optical Image Stabilization) និងកាមេរ៉ា ultra-wide 8MP ។
លើសពីនេះ វាក៏អាចនឹងទទួលបានអាវការពារ IP68 ដែលធន់នឹងធូលី និងទឹក ផងដែរ ដោយដំណើរការលើ Android 15 ជាមួយ HyperOS 2 ដែលផ្តល់បទពិសោធន៍ប្រើប្រាស់ទាន់សម័យ និងរលូន។ យោងតាមការរាយការណ៍ Turbo 4 Pro អាចនឹងចេញលក់ក្នុងប្រទេសចិននៅចុងឆ្នាំ 2025 នេះ ប៉ុន្តែមានឈ្មោះ Poco F7 សម្រាប់ទីផ្សារពិភពលោក៕
