ស្មាតហ្វូនបត់ ៣ តង់ដំបូងបំផុតរបស់ក្រុមហ៊ុន Samsung ត្រូវបានគេរាយការណ៍ថា នឹងមានឈ្មោះថា “Samsung Galaxy G Fold” បើទោះបីជាក្រុមហ៊ុនមិនទាន់ប្រកាសព័ត៌មានលម្អិតជាផ្លូវការនៅឡើយក៏ដោយ ក៏ប៉ុន្តែបើយោងតាមការលេចធ្លាយថ្មីៗនេះបាននិយាយថា ស្មាតហ្វូននេះនឹងមានអេក្រង់ធំទំហំដល់ 9.96 អ៊ីញនៅពេលបើក និង 6.54 អ៊ីញនៅពេលបត់។
ចំពោះរចនាបទបត់របស់ Samsung Galaxy G Fold ត្រូវបានគេរំពឹងថានឹងប្រើប្រាស់នូវរចនាបទបត់រាងអក្សរ G ដែលផ្តល់នូវការការពារប្រសើរជាង Mate XT របស់ Huawei ដែលប្រើរចនាបទបត់រាងអក្សរ S។
លើសពីនេះ Samsung ក៏កំពុងអភិវឌ្ឍអេក្រង់ និងបច្ចេកវិទ្យាការពារថ្មីផងដែរ ដើម្បីធ្វើឱ្យស្មាតហ្វូនបត់របស់ពួកគេមានការប្រើប្រាស់បានយូរឆ្នាំជាងមុន។ ទោះបីជាយ៉ាងណាក៏ដោយ ដោយសារតែភាពស្មុគស្មាញនៃការផលិត Galaxy G Fold អាចនឹងមានបរិមាណផលិតកម្មកំណត់ត្រឹម ២០ មុឺនគ្រឿង ប៉ុណ្ណោះ ហើយតម្លៃរបស់វាអាចខ្ពស់ជាង 2,000 ដុល្លារ។
ខណៈកាលបរិច្ឆេទបញ្ចេញផ្លូវការមិនត្រូវបានបង្ហាញចេញនៅឡើយទេ ប៉ុន្តែអាចនឹងធ្វើឡើងនៅចុងឆ្នាំ 2025 ជាមួយ Galaxy Z Fold 7 និង Z Flip 7 ៕